«Ցույցերի ընթացքում իրավապների վրա հարձակված երիտասարդների հետ երկխոսություն չի լինի». Պեսկով

Ցույցերի ընթացքում իրավապահ մարմինների աշխատակիցների վրա իրականացված հարձակումներին մասնակցած երիտասարդների հետ երկխոսությունն անհնար է: Այս մասին հայտարարել է Ռուսաստանի Դաշնության նախագահի մամուլի քարտուղար Դմիտրի Պեսկովը, հաղորդում է «Կոմերսանտ»-ը:

Ավելի վաղ գիտության և բարձրագույն կրթության նախարար Վալերի Ֆալկովը կոչ էր արել անկեղծ և ազնիվ երկխոսություն անցկացնել բողոքի ակցիաներին մասնակցող երիտասարդների հետ` հակառակ Կրեմլի կողմից երկխոսության բացառմանը:

Պեսկովը հավելել է, որ հարձակումներին չմասնակցած բողոքի ակցիաների մասնակից երիտասարդների հետ երկխոսությունը կշարունակվի և կոչ է արել նրանց զերծ մնալ օրենքը խախտելուց` նշելով, որ իրավապահ մարմինների ներկայացուցիչները շատ ճիշտ են վարվել հարձակում կազմակերպած երիտասարդների հետ:

Այսօր՝ հունվարի 27-ին, Ռուսաստանի Դաշնության քննչական կոմիտեն հաղորդել է, որ ընդդիմության առաջնորդ Ալեքսեյ Նավալնիին սատարելու նպատակով կազմակերպված ցույցի ընթացքում կատարված գործողությունների հետևանքով հարուցվել է 21 քրեական գործ, որոնց քննությունն ընթացքի մեջ է:

Թերթը հիշեցրել է, որ հունվարի 23-ին ընդդիմության առաջնորդ Ալեքսեյ Նավալնիին սատարելու նպատակով ցույցեր են անցկացվել Ռուսաստանի շատ շրջաններում. դրանց նաև երիտասարդներ էին մասնակցում: Հունվարի 26-ին սկսվել են բողոքի ակցիաներին մասնակցած դպրոցականների հարցաքննությունները: Այս մասին «Կոմերսանտին» հայտնել են երեխաների փաստաբաններն ու ծնողները: Հարցաքննությունները տեղի են ունենում անչափահասների `հանրային վտանգավոր իրադարձություններին ներգրավելու դեպքի առթիվ հարուցված քրեական գործի շրջանակներում: