Նախկին աշակերտների նամակներն ի՞նչ կապ ունեն փող հավաքելու հետ

Օրեր առաջ Մոնթե Մելքոնյանի անվան դպրոցի աշակերտների մի խումբ ծնողներ նամակ էին հղել վարչապետին, դպրոցի տնօրենին մեղադրելով դրամաշորթության և այլ ապօրինի գործողությունների համար։ Դպրոցի տնօրենն էլ, եթե հիշում եք, Ռուզաննա Ազիզյանն է՝ Սերժ Սարգսյանի համակուրսեցին և սա առաջին դեպքը չէ, երբ այս կինը դառնում է նման սկանդալի «հերոս»։

Արդեն այս թեմայով գրել էի, ինչի համար մի պահ արժանացա Ազիզյանի ենթակաների ուղղորդված «օնլայն-հարձակմանը»։ Հետո քոմենթները ջնջեցին՝ չգիտեմ, թե ինչի։ Երևի իրենք իրենց գրածից ամաչեցին։ Ինչևէ, այն, ինչ կատարվեց հետո, էլ ավելի խորացրեց կասկածները։ Մեծ հաշվով, ես այդ դպրոցում չեմ եղել, տնօրենին անձմաբ չեմ ճանաչում և դատողություններ եմ անում ծնողների այդ նամակով, որտեղ այնպիսի «ինտիմ մանրամասներ» էին նկարագրված, որ անտեղյակ մարդը չէր կարող հորինել։ Եվ իհարկե, կարող էր այնպես ստացվել, որ մեղադրանքները հերքվեին, չգիտեմ, պարզվեր, որ դա գուցե ինչ-որ մեկն այնուամենայնիվ հորինել է։

Բայց արի ու տես, որ ո՛չ տիկին Ազիզյանը, ո՛չ նրա «պաշտպանները» չփորձեցին անգամ հերքել այդ մեղադրանքները։ Ինքը՝ տնօրենը, լրատվամիջոցներից մեկի տրված հարցերին այդ մեղադրանքների վերաբերյալ պատասխանեց, թե իրենց դպրոցում «շատ լավ մթնոլորտ է», աշակերտներն իրեն սիրում են, բանակից նամակներ են գրում ու եսիմ ինչ։ Չէ, դա, իհարկե, լավ է, որ նախկին աշակերտները նամակ են գրում տնօրենին։ Դա երևի եզակի դեպք է, չգիտեմ՝ ճիշտ է, թե սուտ, բայց դա ի՞նչ կապ ունի նրա հետ, որ տնօրենն ապօրինություններ է թույլ տալիս, նվաստացնում է ուսուցիչներին, աշակերտներից գումար շորթում։

Տնօրենին փորձեցին պաշտպանել նաև մի խումբ այլ աշակերտների ծնողներ, որոնք նույնպես չհերքեցին մեղադրանքները, այլ պարզապես հայտարարեցին, թե դպրոցում «ինչ կատարվում է», ծնողական խորհրդի իմացությամբ ու թույլտվությամբ է կատարվում։ Այսինքն՝ դրամահավաքություն կա, ապօրինություններ կան, բայց դա արվել է մի խումբ ծնողների թույլտվությամբ։

Ես չգիտեմ, Սերժ Սարգսյանին ո՞նց է հաջողվել այսպիսի մարդկանց իր շուրջը հավաքել։ Ախր մեր ազգի մեջ կան էլի ազնիվ, խելացի ու լավ մարդիկ․․․

Հրանտ Ենոքյանի ֆեյսբուքյան էջից