Խելքից դուրս պարտք են վերցնում՝ անունը դնելով «ինչ անում ենք, ժողովրդի համար ենք անում»

Հայաստանի կառավարությունը մտադիր է 1 միլիարդ 234 միլիոն դոլար նոր պարտք վերցնել, որը մենք՝ ՀՀ քաղաքացիներս, պարտավորվում ենք մինչև 2037 թվականը մարել՝ 12.5 տոկոս հավելավճարով: Առանց այն էլ պետական արտաքին պարտքը մոտենում է բոլորիս համար վտանգավոր ու սպառնացող շեմի՝ ապրիլի 1-ի դրությամբ կազմելով 5 մլրդ 996.2 մլն դոլար, հիմա էլ Սերժ Սարգսյանի իշխանությունն այդ ամենին ավելացնում է նոր պարտքեր, նոր տոկոսներ:
Դուրս է գալիս, որ ես մինչ խորը ծերություն պետք է պարտք փակեմ, բայց թե այդ պարտքից իմ կյանքում ինչ կփոխվի, լավ կապրե՞մ, թե՞ վատ, մեծ հաշվով «թքած» ունեն այս իշխանիկները: Այսքան տարիների կուտակած պարտքերից ի՞նչ դրական փոփոխություն է եղել, որ հիմա ակնկալում ենք. այնպես չէ, որ այդ պարտքերից մեր կյանքը բարեկեցիկ է դարձել, այնպես չէ, որ պարտք են վերձնում, որպեսզի ես իմ երկրում հաց վաստակելու խնդիր չունենամ, արտագաղթի աճը կանգնեցնեն, աշխատատեղեր ստեղծեն, աղքատության զգալի թվերը նվազեցնեն... Այս իշխանության գործելաոճն է այդպիսին՝ խելքից դուրս պարտք են վերցնում՝ անունը դնելով «ինչ անում ենք, ժողովրդի համար ենք անում»:
Հա, ի դեպ՝ 2008-2016 թվականների ընթացքում, փաստորեն, Հայաստանի պետական պարտքը աճել է ավելի քան 3 անգամ: Այդ ժամանակահատվածում Հայաստանի իշխանությունները տարեկան միջինը կուտակել են գրեթե կես միլիարդ դոլար պարտք: Եվ եթե առաջիկա հինգ տարիներին պարտքերի կուտակումները շարունակական բնույթ կրեն, շատ մոտ ապագայում այս իշխանությունը երկիրն էլ մեզ հետ միասին կվաճառի, բայց արտաքին պարտքերից չի ազատվի:

Գուրգեն Ամիրխանյանի ՖԲ էջից