«Տոպրակներով մարմիններ են բերել». անհետ կորած զինծառայողների հարազատները սպասում են ԴՆԹ փորձաքննության պատասխանին

Զանգելանի հատվածից գտած զինծառայողների մարմինները դեռ չեն ճանաչվել, ԴՆԹ-փորձաքննության պատասխանների ենք սպասում հասկանալու համար մեր երեխաների մարմինե՞րն են, թե` ոչ: Այս մասին NEWS.am-ի հետ զրույցում ասաց Էջմիածնի N զորամասի անհետ կորած զինծառայողներից մեկի մայրը՝ Անահիտ Ադոյանը:

«Բողոքի ակցիաներ դեռ չենք անցկացնում, քանի որ Զանգելանի հատվածից տոպրակով զինծառայողների մարմիններ են բերել, չգիտենք էլ քանի մարմին է, Աստված տա մեր որդիների մարմինները չլինեն: Բոլորս այս պահին սպասում ենք ԴՆԹ փորձաքննության պատասխաններին»,-ասաց նա:

Նշենք, որ Էջմիածնի N զորամասի 34 անհետ կորած համարվող զինծռայողների հարազատները 3 ամսից ավելի որեւէ տեղեկություն չունեն իրենց զինծառայողներից։ Նրանց խոսքով՝ զինվորներն անհետ կորել են Զանգելանի տարածքում։ Նշենք, որ անհետ կորած զինծառայողների հարազատները պարբերաբար ակցիաներ էին անում զորամասի, Կառավարության եւ ՊՆ դիմաց, պահանջելով, որպեսզի Զանգելանի տարածքում սկսվեն որոնողական աշխատանքերը։