Մարուքյան․ Որպես վարչապետի թեկնածու կառաջադրվեմ

«Լուսավոր Հայաստանը» մերժել է վարչապետ Նիկոլ Փաշինյանի՝ արտահերթ ընտրություններ անցկացնելու և հուշագիր ստորագրելու առաջարկը՝ կոնտր առաջարկով ներկայացնելով ԼՀԿ ղեկավար Էդմոն Մարուքյանի թեկնածությունը, հայտարարել է ինքը՝ ԼՀԿ ղեկավար Մարուքյանը։

«Ես ասել եմ, որ մեր օրակարգն անցումային կառավարություն ձևավորելն է, այդ կառավարության մեր թեկնածուն ես եմ և պետք է առաջադրվեմ, իսկ արտահերթ ընտրություններ կամզակերպելու օրակարգն իշխանության առաջ բերածն է՝ ի պատասխան ընդդիմության՝ վարչապետի հրաժարականի պահանջի։ Չի եղել կոնսենսուս, և այդ հուշագրի թեման փակվել է», - ասել է Մարուքյանը։

Պատգամավորի խոսքով՝ այն, որ իրենք բանավոր ասում են՝ պատրաստ են ընտրություններին և դրա ճանապարհը վարչապետի հրաժարականն է, դա չի նշանակում, որ իրենք չեն առաջադրելու վարչապետի թեկնածություն:

«Հրապարակային ասել ենք, որ առաջադրելու ենք։ Ես կոնտր հուշագիր եմ առաջարկել։ Առաջարկել եմ, որ եկեք ստորագրենք հուշագիր և մինչ դրա ստորագրումը պայմանավորվենք, որ ես ընտրվում եմ, ենթադրենք, մինչև հոկտեմբերի 1-ը, այդ օրը հրաժարական եմ տալիս և չեմ առաջադրվում, և երեք ուժերով պայմանավորվում ենք, որ մարդ չենք առաջադրում և ԱԺ-ն ցրվում է»,- նշել է նա:

Մարուքյանի խոսքով՝ վարչապետին առաջարկած այդ կոնտր հուշագրի շուրջ ևս չի եղել համաձայնություն։

«Հիմա եթե իրենք չեն կարծում, որ կընտրեն, թող գնան այդ ճանապարհով։ Ինչ խնդիր կա, մարդ եմ հիմա, մի անգամ առաջադրվել եմ ԱԺ նախագահի պաշտոնում, չեմ ընտրվել։ Կառաջադրվենք, կընտրվենք՝ կընտրվենք, չենք ընտրվի՝ կցրվենք», - եզրափակել է Մարուքյանը:

 Zham.am