Կարեն Կարապետյանը՝ ՀՀԿ առաջին փոխնախագահ. ՀՀԿ ցուցակը որոշված չէ (տեսանյութ)
ՀՀԿ մամուլի խոսնակ Էդուարդ Շարմազանովը այսօր ՀՀԿ ԳՄ նիստից հետո հայտարարեց, որ ՀՀ վարչապետ Կարեն Կարապետյանը ընտրվել է ՀՀԿ առաջին փոխնախագահ և քաղաքական հանձնաժողովի նախագահ:
«Ընտրվել է նոր խորհուրդ, որին անդամակցել են մեր կուսակցության 35 նոր ներկայացուցիչներ: Ընտրվել են կուսակցության նախագահի տեղակալներ: Կուսակցության նախագահի առաջին տեղակալ է ընտրվել Հայաստանի Հանրապետական կուսակցության Գործադիր մարմնի անդամ, ՀՀ վարչապետ, պարոն Կարեն Կարապետյանը: Կուսակցության նախագահի տեղակալներ են ընտրվել պարոն Մուշեղ Լալայանը, պարոն Գալուստ Սահակյանը և պարոն Արմեն Աշոտյանը:
Ավագների խորհուրդ ունենք, որի նախագահ է ընտրվել Ազգային ժողովի նախագահ Գալուստ Սահակյանը: ՀՀԿ Երևանյան կառույցի ղեկավար է ընտրվել Տարոն Մարգարյանը, կանանց խորհրդի ղեկավար է վերընտրվել Հերմինե Նաղդալյանը»:
ՀՀԿ խոսնակը նաև հայտնեց, որ ՀՀԿ նախընտրական ցուցակը դեռ հայտնի չէ:
«ՀՀԿ նախընտրական ցուցակը որոշված չէ, քննարկումները շարունակվում են: Փետրվարի 6-16-ը օրենքով սահմանված կարգով ՀՀԿ-ն կներկայացնի իր նախընտրական համամասնական ցուցակը ԿԸՀ, դրանից առաջ ներկայացնելով Ձեր ու հանրության դատին», - տեղեկացրեց նա լրագրողներին:
Ինչ վերաբերվում է վերջին շրջանում ՀՀԿ-ում գրանցված արտահոսքին, ապա Էդուարդ Շարմազանովը դա հետևյալ կերպ մեկնաբանեց:
«Հանրապետականից սպասվող արտահոսքի մասին: Դա անհեթեթություն է: ՀՀԿ-ն կենդանի օրգանիզմ է կարող է մեկ, երկու, երեք, չորս գործիչ էլ դուրս գալ: Ոչ առաջին անգամ են դուրս գալիս ոչ վերջին, բայց միայն վերջին երկու ամսվա ընթացքում ՀՀԿ անդամագրվել է 11 հազար քաղաքացի», - ասաց նա:
Անդրադառնալով վերջերս հայ հասարակության մեջ բուռն արձագանք գտած հարցին՝ խորհրդարանական ընտրությունները ապրիլի 2-ին անցկացնելուն, Շարմազանովն ասաց, որ. «Բայց մեր կարծիքը հետևյալն է՝ այո, մենք գտնում ենք, որ ապրիլի երկուսը ազգային համախմբման, ազգային միասնության, մեր հերոս տղաների հիշատակի օրն է, ինչու չէ նաև այս մեկ տարվա ընթացքում բանակաշինության ոլորտում ձեռքբերումների մեկ ամյակը կարող է լինել, և եթե բոլոր քաղաքական դերակատարողները գան քաղաքական պայմանավորվածության, ապա ՀՀԿ-ն այստեղ որևէ քաղաքական խոչընդոտ չի տեսնում: Մենք պատրաստ ենք բոլոր քաղաքական ուժերի հետ քննարկելու այս հարցը»:
Մանրամասները՝ «Ա1+»-ի տեսանյութում: