8 հայ՝ Forbes-ի Ռուսաստանի ամենահարուստ մարդկանց ցուցակում (Տեսանյութ)

Forbes պարբերականը հրապարակել է 2017թ.-ի Ռուսաստանի ամենահարուստների ցուցակը: Ինչպես և նախկինում, ցուցակում տեղ գտած 200 գործարարից 8-ը հայ են: 2016թ.-ի համեմատ հայ գործարարների ընդհանուր կարողությունն աճել է 2.05 մլրդ դոլարով։

200 ամենահարուստ գործարարների համախառն ունեցվածքը մեկ տարվա ընթացքում աճել է 100 մլրդ դոլարով` մինչև 460 մլրդ դոլար։ Դոլարային միլիարդատերերի թիվն ավելացել է` 77–ից հասնելով 96–ի։ Հատման շեմը ևս աճել է` նախորդ տարի գրանցված 350 մլն դոլարից հասնելով 500 մլն դոլարի։

Ցանկը երկրորդ տարին անընդմեջ գլխավորում է Ռուսաստանի խոշորագույն գազ արդյունահանող մասնավոր ընկերության` «Նովատեկի» համահիմնադիր Լեոնիդ Միխելսոնը 18,4 մլրդ դոլար ունեցվածքով։

18-րդ տեղն է զբաղեցրել «Մագնիտ» մանրածախ առևտրի ցանցի գործադիր տնօրեն 49-ամյա Սերգեյ Գալիցկին (Հարությունյան): Նրա ունեցվածքը գնահատվում է 6,8 միլիարդ դոլար:

«Տաշիր» ընկերությունների խմբի նախագահ և հիմնադիր Սամվել Կարապետյանը 32–րդն է՝ 3,4 մլրդ դոլար կարողությամբ։

«Ռոսգոսստրախ» ընկերությունների նախագահ Դանիլ Խաչատուրովը վարկանիշային աղյուսակի 48–րդ հորիզոնականում է: Նրա ունեցվածքը 2 մլրդ դոլար է։

Ռուսական սոցիալական ձեռներեցության առաջատարներից մեկը` ներդրումային բանկիր և բարերար Ռուբեն Վարդանյանը զբաղեցրել է 99–րդ հորիզոնականը, նրա ունեցվածքը գնահատվում է 950 մլն դոլար։

Ցանկի 123–րդ տեղում է Wooden Fish Agency ընկերության դիտորդական խորհրդի ղեկավար Ալբերտ Ավդոլյանը, ում ունեցվածքը գնահատվում է 800 մլն դոլար։

Վարկանիշային ցուցակում են նաև եղբայրներ Նիկոլայ և Սերգեյ Սարգիսովները: Forbes-ի համաձայն՝ եղբայրների կարողությունը 700 միլիոն դոլար է:

Ցուցակում է նաև ծանոթությունների կայքերի՝ Mamba-ի և Badoo-ի հիմնադիր Անդրեյ Անդրեևը (Անդրեյ Օհանջանյան), կարողությունը՝ 500 միլիոն դոլար:

Zham.am