«Պետության և հասարակության կայունության լրացուցիչ փորձության են ենթարկվել Բելառուսը, Ղրղզստանը և Հայաստանը». ՀԱՊԿ գլխավոր քարտուղար Ստանիսլավ Զասի Ամանորի շնորհավորանքը

Հավաքական անվտանգության պայմանագրի կազմակերպության գլխավոր քարտուղար Ստանիսլավ Զասը շնորհավորել է կառույցի անդամ երկրների և դրանց բնակիչների ամանորը: Գլխավոր քարտուղարի ուղերձը հրապարակվել է ՀԱՊԿ պաշտոնական կայքում: Ուղերձում մասնավորապես ասվում է.

«Հարգելի ընկերներ և գործընկերներ:

Մոտենում է նոր 2021 թվականը, որի հետ մենք բոլորս կապում ենք միայն լավագույնը: Պատմության գիրկն անցնող 2020 թվականը լուրջ փորձություն է դարձել բոլորիս համար՝ շատերի համար փոխելով կյանքի սովորական ռիթմը և առաջնահերթություն դարձնելով մարդկության պաշտպանությունը համավարակից: Պետության և հասարակության կայունության լրացուցիչ փորձության են ենթարկվել Բելառուսը, Ղրղզստանը և Հայաստանը:

Նման պայմաններում հատկապես հստակ գիտակցվում են ժամանակակից աշխարհի խոցելիությունն ու փխրունությունը, ինչպես նաև յուրաքանչյուրիս պատասխանատվությունը մեր հայրենիքի անվտանգության և բարեկեցության համար:

Այս դժվարին ժամանակահատվածում մեր երկրները դաշնակցային համերաշխություն և փոխօգնություն ցուցաբերեցին դժվարին, երբեմն ողբերգական իրավիճակներում: Սա ևս մեկ անգամ հաստատում է Հավաքական անվտանգության պայմանագրի կազմակերպության անքննելի կարևորությունն ու նշանակությունը և ցույց է տալիս մեր պետությունների ժողովուրդների բարեկամությունը:

2020 թվականին ՀԱՊԿ-ն ընդունել է մի շարք կարևոր ռազմավարական փաստաթղթեր ռազմական ոլորտում հավաքական անվտանգության համակարգի զարգացման, քաղաքական համագործակցության և մարտահրավերներին և սպառնալիքներին համատեղ հակազդելու վերաբերյալ: Ամրապնդվել է փոխգործակցությունը ահաբեկչության, ծայրահեղականության և թմրանյութերի վաճառքի դեմ պայքարում: ՀԱՊԿ-ի խաղաղապահ բաղադրիչն ամրապնդվել է:

Գալիք 2021 թվականին մենք վճռական ենք տրամադրված ՝ շարունակելու պաշտպանել ՀԱՊԿ անդամ պետությունների շահերը, պաշտպանել դրանցում խաղաղությունն ու կայունությունը, ինչպես նաև ընդլայնել համագործակցությունը արտաքին գործընկերների հետ: Համոզված եմ, որ միասին մենք կկարողանանք հաղթահարել ցանկացած մարտահրավեր և ապահովել հավաքական անվտանգություն եվրասիական տարածաշրջանում:

Բոլորիդ մաղթում եմ քաջառողջություն, ինքնավստահություն և նոր ձեռքբերումներ:

Շնորհավոր նոր` 2021 թվական:

ՀԱՊԿ գլխավոր քարտուղար Ստանիսլավ Զաս»:

Աղբյուր՝ Tert.am