«Լեռնային Ղարաբաղի հակամարտության գոտում իրավիճակը կարգավորվելու միտում ունի. Բաքուն և Երևանը տրամադրված են կատարել ստանձնած պարտավորությունները». Լավրով

ՌԴ արտգործնախարար Սերգեյ Լավրովը ՏԱՍՍ գործակալությանը տված հարցազրույցում անդրադարձել է Լեռնային Ղարաբաղում առկա իրավիճակին: Փոխանցում է Tert.am-ը։ 

Լրագրողի հարցին այն մասին, թե արդյոք Լավրովը մտահոգություն չունի, որ ռուս խաղաղապահները գալիք տարում կարող են հայտնվել կողմերի միջև կրակի գծում, դիվանագետը պատասխանել է.«Մենք ելնում ենք Վլադիմիր Պուտինի, Իլհամ Ալիևի և Նիկոլ Փաշինյանի կողմից նոյեմբերի 9-ին ստորագրված հայտարարության մեջ ֆիքսված պարտավորությունների անվերապահ կատարման անհրաժեշտությունից: Այս իմաստով մենք շարունակում ենք մեր միջնորդական համագործակցությունը Բաքվի և Երևանի հետ:

Լեռնային Ղարաբաղի հակամարտության գոտում իրավիճակը կարգավորվելու միտում ունի: Մենք գոհունակությամբ նշում ենք Բաքվի և Երևանի՝ իրենց պարտավորությունները կատարելու, իրավիճակի ընդհանուր կայունացման ուղղությամբ աշխատելու տրամադրվածությունը:

Կցանկանայի նշել, որ կողմերը համագործակցության բարձր մակարդակ են ցուցաբերում «տեղում» ծագող խնդիրների լուծման հարցում: Ռուսաստանն, իր հերթին, շարունակում է պատասխանատու կերպով և արդյունավետ կատարել հրադադարի ռեժիմի երաշխավորի իր գործառույթը: Դեռևս չեն արձանագրվել սադրիչ գործողություններ ռուս խաղաղապահների նկատմամբ:

Միակ նկատելի խախտումը դեկտեմբերի 13-ին տեղի է ունեցել շփման գծի այն հատվածում, որտեղ ռուս խաղաղապահները ներկա չեն եղել: Մեր խաղաղապահ զորախմբի հրամանատարության կողմից ձեռնարկված եռանդուն քայլերն ադրբեջանցի և հայ գործընկերների հետ շփման ընթացքում, օգնել են խուսափել միջադեպի սրացումից: Մենք կշարունակենք գործադրել բոլոր ջանքերը՝ կանխելու զինադադարի խախտումները:

Օրակարգում հրադադարի ռեժիմի խախտումների կանխարգելումն է, ինչպես նաև տարածքի մաքրումը պայթուցիկ սարքերից, ռազմագերիների և մահացածների մարմինների փոխանակումը, փախստականների և ներքին տեղահանվածների վերադարձի անվտանգության ապահովումը, հումանիտար հրատապ խնդիրների լուծումը, պատմական հուշարձանների պահպանումը `անկախ դրանց պատկանելիությունից, տրանսպորտային և տնտեսական կապերի ապաարգելափակումը: Այս բոլոր ոլորտներում կա որոշակի դրական միտում, բայց կան նաև խնդիրներ, որոնք անխուսափելի են ՝ հաշվի առնելով անսովոր իրավիճակը:

Ինչ վերաբերում է դեռ չլուծված քաղաքական հարցերի քննարկմանը, ես կարող եմ վերահաստատել մեր պատրաստակամությունը ինչպես մեր ազգային շրջանակում, այնպես էլ ԵԱՀԿ Մինսկի խմբի համանախագահների միջոցով աջակցել նման հանդիպումների կազմակերպմանը, հենց որ կողմերը պատրաստ լինեն դրան»,-ասել է ՌԴ արտգործնախարարը:

Հիշեցնենք, որ նոյեմբերի 9-ին Ռուսաստանի, Հայաստանի և Ադրբեջանի ղեկավարները Լեռնային Ղարաբաղում ռուս խաղաղապահների տեղակայման շուրջ պայմանավորվածություն են ձեռք բերել, ստորագրվել է հայտարարություն, որով Ադրբեջանին են անցնում Արցախի յոթ շրջանները, Շուշին ու Հադրութը` բացառությամբ մի գյուղի, գյուղեր Ասկերանի ու Մարտունու շրջանից, ինչպես նաև Մարտակերտի շրջանի Թալիշ և Մատաղիս գյուղերը։

Աղբյուր՝ Tert.am