Այստեղ հավաքվել են մարդիկ՝ պաշտպանելու իրենց ազգային արժանապատվությունը. Վազգեն Մանուկյան. Տեսանյութ

Այստեղ հավաքվել են մարդիկ՝ պաշտպանելու իրենց ազգային արժանապատվությունը։ Այս մասին այսօր՝ դեկտեմբերի 27-ին, Սուրբ Գայանե եկեղեցու բակում լրագրողների հետ զրույցում ասաց Հայրենիքի փրկության շարժման վարչապետի թեկնածու Վազգեն Մանուկյանը: «Եկեղեցու դեմ արշավը նոր բան չի, ոչ թե խոսքը գնում է մեր առաքելական եկեղեցու մասին, այլ կա միջազգային հոսանք, որը երկրներին թուլացնելու համար սկսում է կոտրել իր ավանդույթները։ Ավանդույթները պատմությունն է, լեզուն է, կրոնն է։ Ինչ-որ մարդիկ դրսից փող են ստանում՝ այդ գործն այստեղ անելու համար»,- նշեց նա։

Լրագրողի դիտարկմանը, որ եկեղեցու բակում բավականին մեծ թվով քաղաքացիներ են հավաքվել, Մանուկյանն արձագանքեց. «Որովհետեւ բնակչության 99 տոկոսն՝ անկախ իր վերաբերմունքից՝ հավատացյա՞լ են, թե՞ ոչ, գտնում են, որ այդպիսի բանը սրբապղծություն է; Այստեղ հավաքվել են մարդիկ, որ պաշտպանեն իրենց ազգային արժանապատվությունն ու արժեքները»։ Նշենք, որ մի խումբ քաղաքացիներ հավաքվել են Սուրբ Գայանե եկեղեցու բակում, ովքեր եկել են իրենց աջակցությունը հայտնելու Ամենայն Հայոց Կաթողիկոսին եւ Հայ առաքելական եկեղեցու սպասավորներին, որոնց դեմ բռնության կոչեր են հնչեցրել իշխանությանը սատարողները։