Սյունիքում զարգացումները դրդում են մտածել, որ Փաշինյանն Ադրբեջանի առաջ գաղտնի պարտավորություններ է ստանձնել. Աննա Կարապետյան. Տեսանյութ
Սյունիքում զարգացումները դրդում են մտածել, որ Փաշինյանն Ադրբեջանի առաջ պարտավորություններ է ստանձնել, որոնց մասին չի բարձրաձայնվել, այսօր էլ չի բարձրաձայնվում, բայց դրանք կյանքի են կոչվում: Այս մասին «Առավոտյան լուրեր Լիլիթ Թումանյանի հետ» հաղորդման «Հայացք. Երկրագունդ» խորագրի ներքո ասել է «Հայացք» վերլուծական կենտրոնի տնօրեն Աննա Կարապետյանը:
Նախօրեին կառավարության նիստի ընթացքում Նիկոլ Փաշինյանը հայտարարել էր, որ այն, ինչ տեղի է ունենում այսօր, պետք չէ համարել սահմանների դեմարկացիա և սահմանների դելիմիտացիա: «Դրանք բոլորովին տարբեր հարցեր են, այս փուլում տեղի է ունենում սահմանային որոշակի կետերի տեղորոշում, որի օպերատիվ նպատակն անվտանգության ապահովումն է»,- ասել է Փաշինյանը:
«Ադրբեջանական կողմն արդեն խրամատներ է փորում, դիրքավորվում է, զինվորներ են կանգնում: Էլ ո՞րն է դեմարկացիոն գործընթացը, եթե ոչ սա»,- նշել է Աննա Կարապետյանը:
Նա նաև հավելել է, որ դեմարկացիոն գործընթացը սովորաբար ենթադրում է բավական երկար միջգերատեսչական բանակցություններ: Ե՛վ մենք, և՛ Ադրբեջանը ԵԱՀԿ անդամ երկրներ ենք, ԵԱՀԿ-ն հստակ ուղեցույց ունի, որը հստակ սահմանում է, թե ինչպես պետք է տեղի ունենա դեմարկացիոն գործընթացը: Սակայն, այսօր զարգացումները լրիվ այլ ընթացակարգով և տրամաբանությամբ են ընթանում:
«Եթե այդ սկզբունքներով բնականոն բանակցություններ ընթանային, չէր ստեղծվի մի իրավիճակ, երբ գյուղի մի քանի տներ անցնում են մյուս կողմին»,- ասել է Կարապետյանը՝ հիշեցնելով այսօր Որոտան համայնքում տեղի ունեցող զարգացումները:
Փորձագետը նշել է, որ նախ կողմերից յուրաքանչյուրը պետք է իր երկրում ձևավորեր հանձնաժողով, ամրագրեր իր բանակցային մոտեցումները, հետո արդեն համատեղ հանձնաժողովի կազմում տեղի ունենային բանակցություններ՝ հաշվի առնող մի շարք հանգամանքներ:
«Այսօր առաջինը՝ հայկական կողմն ունակ չէ բանակցել, երկրորդը՝ հայկական կողմի հետ չեն բանակցում»,- նշել է Կարապետյանը:
Ընդհանուր գործընթացի տրամաբանությունից և Նիկոլ Փաշինյանի հայտարարություններից ելնելով՝ փորձագետը նշել է. «Մնում է ենթադրել, որ կա որոշակի պայմանավորվածություն, կա հայկական կողմի ստանձնած պարտավորություն, որի մասին չի բարձրաձայնվել, այսօր էլ չի բարձրաձայնվում, բայց կյանքի է կոչվում»:
Մանրամասները՝ Tert.am-ի տեսանյութում:
Հետևեք մեզ Facebook-ում