Հայաստանի այսօրվա կառավարությունը չի կարողանում պաշտպանել Հայաստանի շահերը. Զատուլինը՝ սահմանում տիրող իրավիճակի մասին

Դելիմիտացիայի գործընթացը չի կարող միակողմանի լինել: Այս մասին հայտարարել է ՌԴ պետդումայի պատգամավոր Կոնստանտին Զատուլինը՝ խոսելով մասնավորապես Սյունիքում այս օրերին տեղի ունեցող գործընթացի մասին:

«Նման դեպքերում գործում են համատեղ հանձնաժողովներ: Օրինակ մենք ժամանակին նման աշխատանք կատարել ենք Չինաստանի հետ, այսօրվա դրութամբ որևէ կասկած չկա, թե որտեղով է անցնում սահմանը:

Այն, որ Հայաստանի մասով դա հիմա չկա հետևանք է պարտության ու այն բանի, որ Հայաստանի այսօրվա կառավարությունը չի կարողանում պաշտպանել Հայաստանի շահերը: Եթե մասշտաբային խախտումներ են լինում, դա պետք է ոչ միայն Հայաստանի, այլ նաև Ռուսաստանի խնդիրը լինի, քանի որ Ռուսաստանը ներգրավված է Հայաստանի սահմանների պաշտպանության գործում: Սակայն, ցանկացած դեպքում առանց հենց Հայաստանի դժվար է զբաղվել Հայաստանի շահերի պաշտպանությամբ կամ սահմաններով:

Եթե Հայաստանի իշխանություններն ունակ չեն դա անել, Հայաստանում պետք է իշխանության գան այն ուժերը, որոնք կարող են պաշտպանել Հայաստանի շահերը: Հայաստանի փոխարեն հնարավոր չէ անել այն, ինչը պետք է անի Հայաստանը, եթե անկախ պետություն է»,-ասաց նա:

Աղբյուրը՝ analitik.am