Պատրաստվեք ու քվեարկեք ՀՀ գլխավոր դավաճանին՝ Նիկոլ Փաշինյանին պաշտոնանկ անելու համար. Արծվիկ Մինասյանը՝ կառավարության 14 անդամներին

Կառավարության շենքի մոտ շարունակվում է Նիկոլ Փաշինյանի հրաժարականի պահանջով քաղաքացիների բողոքի ակցիան: ՀՅԴ ԳՄ անդամ Արծվիկ Մինասյանը իր խոսքում դիմեց կառավարության 14 անդամներին՝ պատրաստվել ու քվեարկել պաշտոնանկ անելու համար ՀՀ գլխավոր դավաճանին՝ Նիկոլ Փաշինյանին:

Նա նախ ընթերցեց ՀՀ նախագահի մոտ նախարարների՝ պարտականությունը ստանձնելուց առաջ երդման տեքստը: «Ժողովրդի առջև ձեր ունեցած առաջին պարտավորությունն է կատարել ժողովորդի պահանջը, այն է՝ վարչապետ Նիկոլ Փաշինյանին պաշտոնանկ անել, երկրորդ պահանջն է՝ ինքնիշխանությանը և Հայաստանի շահերի պաշտպանությանը դավաճանած մարդուն հեռացնել պաշտոնից: Կառավարության յուրաքանչյուր անդամ իր համար սա որպես Սահմանադրությամբ և օրենքով նախատեսված պահանջ պետք է ընդունի: Դրանից ելնելով՝ եթե ձեզնից յուրաքանչյուրը չկատարի այս պահանջը, կհամարվի երդմնազանց, հայ ժողովրդի թշնամի, հակառակորդ»,- ասաց նա:

Մինասյանը նշեց, որ ՀՀ անվտանգությանը ամեն վայրկյան կործանում է սպառնում, ՀՀ յուրաքանչյուր քաղաքացու, յուրաքանչյուր մարդու համար այսօր Հայաստանը դարձել է վտանգավոր վայր. «Դավաճանը պետք է դատվի, երաշխավորում ենք, որ արդար դատական համակարգով նա կստանա իր արժանի պատիժը, բայց դրա համար չափազանց կարևոր է ձեզնից յուրաքանչյուրը. հանած վարչապետին՝ 14 կառավարության անդամ, եթե ներսում եք արդեն, պատրաստվեք, որ քվեարկեք պաշտոնանկ անելու համար ՀՀ գլխավոր դավաճանին»,- հայտարարեց նա:

Աղբյուր՝ Tert.am