Հոսանքի թանկացման բացասական հետևանքները զգալու են բոլորը, այդ թվում՝ սոցիալապես անապահովները. փորձագետ. Տեսանյութ

Հանրային ծառայությունները կարգավորող հանձնաժողովի կողմից հոսանքի թանկացման հարցը տարբեր հարթությունների խնդիր է: «Առաջին հերթին հոսանքի թանկացումը, որն առաջին հայացքից շարքային սպառողներին չի վերաբերում, հանգեցնելու է բացասական հետևանքների, որից որևէ կերպ ոչ ոք չի խուսափելու, այդ թվում՝ սոցիալապես անապահով հատվածը»:  Այս մասին «Առավոտյան լուրեր Լիլիթ Թումանյանի հետ» հաղորդման «Հայացք. տնտեսություն» հատվածում ասել է «Հայացք» վերլուծական կենտրոնի փորձագետ Լիլիա Ամիրխանյանը:

Լ. Ամիրխանյանն ասել է, որ հոսանքի թանկացումը հանգեցնելու է առաջին անհրաժեշտության ապրանքների թանկացման: «Երկրորդ խնդիրը, որն առկա էր նաև գազի սակագնի թանկացման ժամանակ, հարցն է, թե իրականում ո՞ր դեպքում սպառողն ավելի շատ կտուժի. այն դեպքում, եթե  սակագնի որոշակի բեռ կրի՞, թե՞ եթե այդ բեռն ուղղվի տնտեսվարողների կողմ և հանգեցնի շղթայական բացասական հետևանքների»,- նշել է փորձագետը:

Լիլիա Ամիրխանյանի պնդմամբ՝ երրորդ հարթությունը հայկական էներգետիկ շուկայի համակարգային խնդիրներին է առնչվում. «Ատոմակայանի երկրորդ էներգաբլոկի վերանորոգման աշխատանքների ձգձգման, ռուսական վարկից հրաժարման արդյունքում այդ թվում՝ 2021 թ. ատոմակայանը բավական երկար ժամանակ չի գործի, ինչի արդյունքում անհրաժեշտ հոսանքի գեներացման բեռը կընկնի հիմնականում ջերմակայանների վրա»: Ամիրխանյանը հիշեցրել է, որ ջերմակայաններն ավելի թանկ էներգիա արտադրողներ են, հատկապես որովհետև աշխատում են թանկացած գազով:

Մեկ այլ խնդիր  փորձագետը մատնանշեց հիդրոկայանների նկատմամբ վերջին տարիներին իրականացված պատժիչ գործողությունների ուղղությամբ:

Մանրամասները՝ Tert.am-ի տեսանյութում