Եկեղեցու մեջ ումի՞ց էին պաշտպանում Նիկոլին նրա թիկնապահները

Դրամատուրգ Սամվել Խալաթյանը ֆեյսբուքյան իր էջում գրել է.

«Ոմանք սկսել են քննադատել Սիսիանի եկեղեցու քահանային՝ Նիկոլին ձեռքով չողջունելու համար, դրանով ցուցադրելով իրենց անգրագիտությունը քրիստոնեկան վարքականոնից և ազգային ավանդույթներից:
Ուշադիր նայեք այդ միջադեպի տեսագրությանը:

Անգամ եկեղեցու ներսում՝ խորանի անկյուններում, աչալուրջ հերթապահում են թիկնապահները, իսկ նրանցից մեկը՝ քաղաքացիական հագուստով կին, կանգնած է թիկունքով խորանին, իբր աղոթում է: Եթե նա իրապես աղոթող լիներ, ապա, նախ, գլխաշոր պիտի ունենար, երկրորդ՝ դահլիճում պիտի լիներ և ոչ թե խորանի բեմեզրին և, ամենագլխավորը՝ տեսած կա՞ք, որ հայ կինը եկեղեցում աղոթք անի՝ խորանից շրջված, թիկունքով կանգնած: Նույն այդ կինը, Նիկոլի հեռանալուն պես շտապում է լքել իր պոստը և դեմ առ դեմ է հայտնվում իր պաշտպանյալին, երբ վերջինս հանկարծ կանգ է առնում, շրջվում՝ հիշելով, որ խաչակնքելու է եկեղեցուց դուրս գալուց առաջ: 

Հիմա՝ վերլուծենք. եկեղեցու մեջ ումի՞ց էին պաշտպանում Նիկոլին նրա թիկնապահները, երբ սրահում եղած «օտարները» քահանան էր ու սրբապատկերներն էին: Կամ, ենթադրենք, Նիկոլի համար մի անցանկալի դիպված լիներ, այդ ֆառաշները հարձակվելո՞ւ էին կարգը խախտողի վրա՝ քացու տա՞կ գցեին, կամ կայծակնային արագությամբ հանելու էին իրենց զենքերն ու արյո՞ւն թափեին եկեղեցում:
Ով էլ որ ուզում է լինի, վարչապետ, թե՝ փադիշահ, եթե որպես ուխտավոր-հավատացյալ է, մուտք գործել եկեղեցի, մոտենալով քահանային պարտավոր է խոնարհումով ողջունել՝ օրհնանք ստանալու համար, և ոչ թե սեղմել նրա ձեռքը՝ գրասենյակի գործավարի տեղ դնելով:

Այնպես որ քաղաքացիական դիրքորոշումից զատ, Պարգև քահանա Զեյնալյանը պաշտպանեց  եկեղեցու հեղինակությունն ու կանոնակարգը՝ կրոնավորի ազնիվ ու վեհ արարքով»: