«Եթե էլիտան պահանջում է, որ գնաս, նշանակում է՝ մյուս մասն էլ «ժե՞խն է»». Վարդան Այվազյանը՝ Նիկոլ Փաշինյանին

Պարտվելն է մարդու համար, բայց բոլոր դեպքերում պետք է լինես արժանապատիվ։ Այս մասին այսօր՝ դեկտեմբերի 17-ին, հրավիրված ասուլիսում ասաց ՀՀ բնապահպանության նախկին նախարար Վարդան Այվազյանը։

«Ամենավերջին խոսքերն են այնտեղից հնչեցվում վարչապետի, ազգի հասցեին, զրո պատասխան։ Ցավոք սրտի, մեր մեղքն էլ շատ կա, մենք գրեցինք մի Սահմանադրություն, որում կրիզիսային վիճակում լուծումներ չտվեցին, թողեցին միայն վարչապետի բարոյական կերպարի վրա այդ լուծում»,- նշեց նախկին նախարարը։

Անդրադառնալով վարչապետի կողմից հնչեցված այն մտքին, որ էլիտան է այսօր իր հրաժարականը պահանջում՝ Այվազյանն արձագանքեց. «Ողջունելի է եւ շատ ցավալի է։ Եթե էլիտան պահանջում է, որ գնաս, ուրեմն հասել ես այն աստիճանի… նշանակում է, որ մյուս մասն էլ ժե՞խն է»։

Այվազյանը բերելով Գերմանիայի օրինակը, նշեց, որ ՀՀ քաղաքացին էլ պետք է համախմբվի եւ իր «մեջքն ուղղի». «Այս քաղաքական ուժն ամբողջապես ձախողել է։ Եթե բանակցություններին նստեն, մեկը փորձի իր մազն ուղղել, իրենք պետք է ձեռքերն անպայման վեր բարձրացնեն։ Ո՞նց կարող է հայ քաղաքացին նայել Փաշինյանի դեմքին ու քաջալերվել։ Երբ որ բառակույտերից, ֆեյսբուքյան պատերազմներից կանցնենք կոնկրետ գործողությունների… մարդիկ սոված են, տուժած են, կորցրած որդի ունեն, կոնկրետ գործողություններ են ուզում: Գերի ընկածներով զբաղվում են բոլորը, բացի կառավարությունից: Բա ինչի՞ համար եմ ես հարկ տալիս, որ այդ փափուկ աթոռների՞ն նստեք: Միայն բառախաղեր ու բառակույտեր, դրա համար մտածող մարդն ասում է՝ չի լինի այսպես…Գյուղապե՞տը պետք է պաշտպանի մեր սահմանը, թե՞ ռուսը: Եթե ռուսը պետք է պաշտպանի, այդ դեպքում եկեք գնանք մտնենք Ռուսաստանի կազմի մեջ: Հո խոսելով չի՞»։

Անդրադառնալով Նիկոլ Փաշինյանի այն մտքին, որ այս գործընթացներում ինքը պատասխանատուն է, բայց մեղավորը չի, Այվազյանն ասաց. «Պատասխանատվությունն ու գործողությունն իրար հետ պետք է լինի։ Ինչի՞ համար ես պատասխանատու։ Եթե դու պատասխանատու ես, գործողություններդ տապալված են, ուրեմն մեղավոր ես։ Պատասխանատու ես հրաման տալու, մեղավոր չե՞ս, որ հրամաններդ չի կատարվում, պատասխանատու ես տնտեսությունը զարգացնելու համար, բայց կոլապսի է գնում, պատասխանատու ես մարդկանց բուժելու, բայց տեսնում ես՝ շատ մարդիկ են մահանում, պատասխանատու ես պատերազմը սկսելուն, բայց կապիտուլյացիայի դեպքում մեղավոր չե՞ս»։

Այվազյանը շեշտեց, որ իր ներքին համոզմամբ, երկիրը ճգնաժամից հանող անձը Ռոբերտ Քոչարյանն է. «Ռոբերտ Քոչարյանն ունի աշխատանքային փորձ։ Մեր ռազմական գործընկերն էլ տեսնում է դա։ Նա եղել է տարածաշրջանային կայունությունն ապահովողն ու զարգացնողը։ Ալիեւն իրենից է սարսափում, ասում է՝ ես քեզ չեմ հաղթել, իրեն եմ հաղթել։ Սիրել-չսիրելով չպետք է լինի, պետք է հասկանաս՝ կարո՞ղ է, թե՞ ոչ։ Այսօր գահավիժումը կանգնեցնելու խնդիր կա Աշխարհաքաղաքական զարգացումներ է գնում, փռել ու կիսում են մեզ»։

Այվազյանը նշեց, որ իր նկատմամբ հարուցված քրեական գործն հետ չի կանգնեցնելու իրեն իր պահանջից. այսօր էլ մասնակցելու է հանրահավաքին։

Անդրադառնալով իր տան խուզարկությանը՝ նշեց, որ ոչ միայն իր տանն է եղել խուզարկություններ, այլ նաեւ իր աշխատասենյակում, դրստեր եւ որդու բնակարաններում։