Երևանում կորոնավիրուսից հղի կին է մահացել. ԱՆ խոսնակը հաստատեց

Օրերս Երեւանի հիվանդանոցներից մեկում կորոնավիրուսից հղի կին է մահացել։ նախնական տվյալներով՝ կնոջ մահվան պատճառը եղել է կորոնավիրուսը։ Այս մասին տեղեկությունը NEWS.am-ի հետ զրույցում հաստատեց Առողջապահության նախարարի մամուլի խոսնակ Ալինա Նիկողոսյանը:

«Ցավոք սրտի, երեկ ունեցել ենք մայրական մահացության դեպք: 40-ամյա կինն ունեցել է կորովիրուսային հիվանդություն, թոքաբորբ, ինչպես նաեւ մի շարք ուղեկցող քրոնիկական հիվանդություններ: Պրոգրեսիվող շնչական անբավարարության պատճառով դեկտեմբերի 2-ին տեղափոխվել է վերակենդանացման բաժանմունք:

Այդ ընթացքում առողջապահության նախարարության կողմից կազմակերպվել են կրկնակի կոնսիլիումներ` հանրապետության առաջատար մասնագետների ներգրավմամբ, սական, չնայած ձեռնարկված համալիր բուժական միջոցառումների, պացիենտի վիճակը շարունակել է վատանալ:

Դեկտեմբերի 11-ին արձանագրվել է պտղի մահ, որի կապակցությամբ կյանքի ցուցումով կատարվել է ծննդալուծում` կեսարյան հատման միջոցով, որի ընթացքում արձանագրվել է սրտի ռիթմի խանգարում, արյան շրջանառության կանգ, իրականացվել են վերակենդանացման միջոցառումներ, պացիենտը միացվել է թոքերի արհեստական շնճառության սարքին:

Դեկտեմբերի 13-ին վերջինիս վիճակը կտրուկ վատացել է եւ չնայած ողջ ծավալով իրականացված վերակենդանացման միջոցառումների, արձանագրվել է կենսաբանական մահ»,- ասաց Նիկողոսյանը:

Ավելի վաղ ArmDaily.am-ին  հայտնել էր, որ ծննդկանը գտնվում էր հղիության 7-րդ ամսում: Կինը 3 երեխաների մայր է, մասնագիտությամբ բժշկուհի։

NEWS.am