Վահե Ղալումյանն ու Դավիթ Նահապետյանն ընտրվեցին առաջադրված պաշտոններում, իսկ «Իմ քայլը»–ի թեկնածու Կարեն Առուստամյանին ԱԺ-ն չընտրեց Հաշվեքննիչ պալատի անդամի պաշտոնում

Ազգային ժողովում ավարտվել են Հաշվեքննիչ պալատի անդամի, ԿԲ խորհրդի անդամի և ԱԺ տարածքային կառավարման, գյուղատնտեսության ու բնապահպանության մշտական հանձնաժողովի նախագահի ընտրությունները:

Հաշվիչ հանձնախմբի նախագահ Վահագն Հովակիմյանը տեղեկացրեց, որ քվեարկությանը 132 պատգամավորներից մասնակցել է 84-ը:

Հաշվեքննիչ պալատի անդամի պաշտոնում «Իմ քայլը» խմբակցությունը ներկայացրել էր Կարեն Առուստամյանի թեկնածությունը: Քվեարկությանը մասնակցած 84 պատգամավորներից նրան կողմ էր քվեարկել 79-ը, դեմ՝ 3-ը, իսկ 2 քվե անվավեր էր, այսպիսով` Կարեն Առուստամյանը չընտրվեց առաջադրված պաշտոնում:

ԿԲ խորհրդի անդամի պաշտոնում ընտրվել է Դավիթ Նահապետյանը, 84 պատգամավորներից նրա օգտին էին քվեարկել 81-ը, դեմ՝ 1-ը, անվավեր էր ճանաչվել 2 քվեաթերթիկ:

ԱԺ տարածքային կառավարման, գյուղատնտեսության ու բնապահպանության մշտական հանձնաժողովի նախագահի պաշտոնում առաջադրված Վահե Ղալումյանը ևս ընտրվել է: Նրա օգտին քվեարկությանը մասնակցած 84 պատգամավորներից քվեարկել էին 77-ը, դեմ՝ 4-ը, անվավեր էր ճանաչվել 3 քվեաթերթիկ:

ԱԺ նախագահ Արարատ Միրզոյանը հայտարարեց, որ նամակով կդիմի ԱԺ խմբակցություններին, որպեսզի Հաշվեքննիչ պալատի անդամի թեկնածու առաջադրեն։

Աղբյուր՝ Tert.am