Ես հավատում եմ, որ մեր ժողովուրդը՝ որոշիչ պահին առավել քան իմաստում է լինում. ես հավատում եմ, որ մենք քայլ առ քայլ մոտենում ենք այս իրավիճակից ճիշտ ելքեր գտնելուն

Հայաստանում ազգային շարժումները միշտ էլ սկսվել են փոքրաթիվ մարդկանց միջոցով, այսօր մենք տեսնում ենք, թե ինչպես է ամեն օր ընդլայնվում ազգային արժանապատվության համար ոտքի կանգնող, ու ազգային աղետը գիտակցող մարդկանց շրջանակը:

 

Իհարկե կան մարդիկ, ովքեր դեռևս կարծում են, որ Նիկոլը կարող է ինչ-որ բան անել, դեռ ինչ-որ բանի ընդունակ է: Բայց դա միայն ժամանակի խնդիր է: Շատ շուտով մարդկանց մեծամասնությունը տեսնելու և գիտակցելու է, որ այս իշխանություններն իրենց գոյությամբ միայն վնաս են հասցնում մեր պետության շահեր: Նրանք ի զորու չեն այլևս որևէ օգտակար գործ անել մեր երկրի ու քաղաքացիների համար:

 

Ավարտվել է Նիկոլի և իր թիմի քաղաքական ժամանակը: Լավն էր այն թե վատը՝ դա պատմության գնահատելիքն է: Բայց, որ այս պահի համար այն դարձավ կործանարար, դարձավ պետության համար ավերիչ ու ողբերգական, դարձավ Հայրենիքի կորստի փաստ, դարձավ բազմաթիվ զոհերի, վիրավորների ու անվտանգության նոր սպառնալիքների պատճառ՝ անհերքելի է:

 

Եթե այսօր ժողովրդի առողջ սերուցքը՝ մտավորականը, քաղաքական ու հանրային գործիչը, պետական ծառայողը, ուժային կառույցի ներկայացուցիչը, աշխատավոր մարդը հանդուրժի Նիկոլի հետագա իշխանավարումը, ապագայում պատմությունը մեզ բոլորիս չի ներելու նոր ողբերգություններն ու աղետները:

 

Ես հավատում եմ, որ մեր ժողովուրդը՝ որոշիչ պահին առավել քան իմաստում է լինում: Ես հավատում եմ, որ մենք քայլ առ քայլ մոտենում ենք այս իրավիճակից ճիշտ ելքեր գտնելուն: Դրա համար մեզ պետք է հանդուրժողականություն, համատեղ ջանքեր, միամյանց լսելու և հասկանալու կարողություն, միասին ապրելու և արարելու իմաստնություն, և Հայրենիքը սիրելու ու դրանով գործելու մեծ հավատ: