Սա միջանկյալ լուծում է. Ջանջուղազյանը չբացառեց պարգևավճարներով վարձատրության համակարգի վերանայումը

ՀՀ Ֆինանսների նախարար Ատոմ Ջանջուղազյանը չի բացառում հնարավորությունը, որ պետական կառավարման համակարգում պարգևավճարներով վարձատրության համակարգը կարող է վերանայման ենթարկվել՝ շեշտելով` սակայն պետական համակարգում աշխատանքի համար վարձատրությունը ոչ մի կերպ չպետք է դառնա պարսավանքի առարկա, հակառակը՝ բարեխիղճ աշխատանքն արժանի է գնահատանքի: «Արմենպրես»-ի հաղորդմամբ՝ նախարարը նման տեսակետ հայտնեց ԱԺ-ում Հայաստանի Հանրապետության 2021 թվականի պետական բյուջեի մասին օրենքի նախագծի քննարկմանը՝ անդրադառնալով հանրային ծառայությունների վարձատրության համակարգին:

Նա հիշեցրեց, որ գործող օրենսդրական կարգավորումների շրջանակում կան վարձատրության տարբեր կատեգորիաներ՝ հիմնական աշխատավարձ, հավելավճարներ, պարգևատրումներ:  Նախարարը ներկայացրեց, թե ինչ է տեղի ունեցել վերջին երկու տարվա ընթացքում:

«Տեղի է ունեցել հետևյալը. նախկինում շուրջ երկու տասնամյակ միայն Ֆինանսների նախարարության համար էր բյուջեով նախատեսված՝ առանձին տողով որպես պարգևավճար, և կային արտաբյուջետային հաշիվներ, որտեղ հնարավորություններ էր ընձեռում ունենալ ԱԺ-ի կողմից չհաստատվող, միայն կառավարության կողմից հաստատվող նախահաշվի շրջանակներում հնարավորություն՝ ֆինանսավորել այս կամ այն ծրագրերը՝ ներառյալ նաև պարգևավճարները՝ այնքանով, որքանով այդ արտաբյուջետային գործառնություններից մուտքեր կառաջանային: Հիմա տրվել է միասնական լուծում՝ այն տրամաբանությամբ, որ մինչև 20 տոկոսի չափով բոլորի համար նախատեսվի այդ պարգևավճարը, ոչ թե ընտրովի»,-ասաց նախարարը:

Նա նշեց՝ օրինակ` ոստիկանությունն ուներ արտաբյուջետային հաշիվ, և այն ՃՈ-ի դեպքում գոյանում էր արձանագրված խախտումների գումարներից, ապա ներկայում այդ խախտումների համար վճարներն ամբողջությամբ պետբյուջեի համար մուտքեր են, փոխարենը ոստիկանության համար նախատեսված է այն չափով, որքանով անհրաժեշտ է: «Որպեսզի ՃՈ-ի ծառայողի բարեկեցության աստիճանը կախված լինի ոչ թե նրանից, թե որքան խախտում է արձանագրել, և այդ արձանագրած խախտումներից՝ պարգևատրման որոշակի հավակնություններ ունենա, այլ ճիշտ հակառակը՝ ջանք գործադրի, որ կանխարգելի խախտումների ռիսկերը»,-ասաց Ջանջուղազյանը:

Անդրադառնալով նրան, թե ինչու է ընտրվել հենց պարգևավճարների լուծումը և ինչու չէր կարելի այդ չափով վերանայել բազային աշխատավարձը կամ գործակիցները, Ջանջուղազյանն ասաց, իհարկե կարելի էր: «Բայց կարելի է նաև ոչ միայն անցյալ կատարյալ ժամանակը օգտագործել, այլ՝ հետոյի համար՝ այն դեպքում, եթե համոզված լինենք, որ մեր կառավարման համակարգը դանդաղաշարժ է, ծանրաբեռնված է հաստիքներով, որոնք ժամանակին ինչ-որ պահին ունեցել են արդարացում՝ ձևավորելու համար, բայց զարգացումներով պայմանավորված՝ փոխվել է նրանց նկատմամբ պահանջարկը, բայց նրանք շարունակում են մնալ որպես հաստիքներ: Եթե այդ խնդիրը լուծված լինի, բնականաբար մենք կարող ենք անդրադառնալ այլ լուծմանը: Բազմիցս հայտարարվել է՝ սա միջանկյալ լուծում է, քանի դեռ մենք ձեզ հետ միասին չենք համոզվել, որ մեր կառավարման համակարգը օպտիմալ է, և այստեղ չկան լրացուցիչ թերծանրաբեռնված կամ ծանրաբեռնված հաստիքներ, որոնք գործնականում ոչինչ չեն անուն: Եթե կարողանանք համարել, որ այդ մասն այլևս բացակայում է մեր կառավարման համակարգում, այդ ժամանակ կարող ենք հիմնական լուծում տալ հարցին»,-ասաց նախարարը:

Նա շեշտեց՝ իսկ մինչև այդ, դա հնարավորություն է, որոշակի մոտիվացիա՝ խթաններ պահելու համար համակարգում: Դա անհրաժեշտ է պետական կառավարման համակարգում որակյալ կադրեր ներգրավելու համար: Ջանջուղազյանի խոսքով՝ 19709 հաստիքի համար 2020 թվականին, եթե պարգևավճարների գումարը նույնպես հաշվի առնվի, միջին վարձատրությունը կազմում է 370 հազար դրամ, առանց դրա կկազմի 280 հազար դրամ:

Նախարարը նշեց, որ երբեմն տպավորություն է ստեղծվում, թե պետական մարմնում աշխատանքը, դրա համար վարձատրությունը հասարակական պարսավանքի առարկա է: «Քավ լիցի, դա աշխատանք է, և կարծում եմ՝ բոլոր նրանք, որոնք իրենց աշխատանքը բարեխիղճ կատարում են, պատասխանատվությամբ են մոտենում իրենց աշխատանքին, արժանի են հարգանքի, և պետք է գնահատվեն համարժեքորեն»,-եզրափակեց Ջանջուղազյանը: