Մարտի 1-ի դատավարությունը պետք է շարունակվի. Բայց նախ ամբաստանյալները կփոխվեն

Վերջերս լսում եմ խոսակցություններ այն մասին, որ հատկապես պատերազմից հետո պետք է դադարեցվի մարտի 1-ի դեպքերի կապակցոցյամբ դատավարությունը, քանի որ ամեն ինչ ավարտվել է ու ամեն բան հիմա անիմաստ է: Ես համաձայն չեմ այս կարծիքի հետ:

Պատերազմը, Նիկոլ Փաշինյանի պահվածքը պատերազմի օրերին, երբ, ըստ Մովսես Հակոբյանի, նա առաջին օրերին դադարեցրեց լրահամալրումը, ռազմական գործողությունները, որոնք, ըստ չհերքված տվյալների` ղեկավարում էր Փաշինյանի կինը, և որոնք մեր զինվորներին մղում էին մահվան, ստիպում են մեզ նորովի նայել նաև 2008-ի իրադարձություններին:

Նա, ով 5000 մարդ մահվան է դատապարտել, ավելի քան 10 000-ի հաշմանդամ է դարձրել, առանց մեկ վարկյան մտածելու կարող էր եւ 10 մարդու մահվան դատապարտել հենց մայրաքաղաքում: Դա սարսափելի է թվում, բայց ի՞նչ է 10 հոգի նրա համար, ով 5000-ի մահից հետո ժպիտը դեմքին բունկերից դուրս է գալիս ուղիղ եթեր ու կոչ անում մարդկանց վրեժ լուծել: Արդյոք Նիկոլը նույնը չէ՞ր անում 2008-ին:

Սրան գումարենք Նիկոլ Փաշինյանի «հոգեւոր հայր» Լեւոն Տեր-Պետրոսյանի խոսքերը, ով իր վերջին հայտարարության մեջ փաստացի ասում է, որ Փաշինյանն արկածախնդիր է և կանգ չի առնելու ոչնչի առաջ: Դա այն չէ՞, ինչ մենք տեսանք 2008-ին:

Հիմա կարող ենք վստահորեն ասել, որ մարտի 1-ի ողբերգական իրադարձությունները հրահրվել են Նիկոլ Փաշինյանի կողմից: Ավելին, ողբերգությունից հետո «նա գերի վերցրեց» այդ մարդկանց հիշատակը և նրանց մահը վերածեց իր «քաղաքական կապիտալի»: Նա նաև «գերի է» վերցրել անհայտ կորած և գերեվարված զինվորների ծնողներին: Նա արգելում է այս մարդկանց պայքարել իրենց երեխաների համար և ասում, որ միայն ինքը կարող է լուծել նրանց խնդիրը, և այդ ծնողները ոչ մի դեպքում չպետք է միանան ընդդիմությանը:

Կարծում եմ, որ մարտի 1-ի դեպքերի վերաբերյալ դատավարությունը պետք է շարունակվի, բայց ամբաստանյալները պետք է լինեն այլ մարդիկ, իսկ նրանց «առաջին դեմքը» պետք է լինի Նիկոլ Փաշինյանը:

Հասարակությունը պիտի իմանա ճշմարտությունը 2008-ի իրադարձությունների մասին: Այս ճշմարտությունը շատերի աչքերը կբացի նաեւ 2020 թ. պատերազմի իրադարձությունների վրա: Մեզ մեծ փոփոխություններ են սպասվում, և Նիկոլ Փաշինյանը հետևելու է այս փոփոխություններին այլ կարգավիճակով:

Սևակ Դանիելյան