Տեր-Պետրոսյանը բացահայտել է մարտի 1-ի հանցագործությունը

Վերջին օրերին Լեւոն Տեր-Պետրոսյանի ցուցաբերած ակտիվությունը հասկանալի է: ՀՀ առաջին նախագահը հասկանում է, որ եթե Փաշինյանը երկրի քաղաքական թաթերաբեմից մաքրվելու է «ատելության ալիքով», ապա այդ ալիքը կարող է մաքրել նաեւ իրեն, քանի որ Տեր-Պետրոսյանը Նիկոլ Փաշինյանի «քաղաքական հայրն է»: Հենց Լեւոնն էր, որ Նիկոլին դարձրեց «իր հանրահավաքների թամադան», հայ հասարակության մեծ մասին ծանոթացրեց այս լրագրողի հետ:

Այս ամենը հասկանալի է, բայց մեզ բոլորովին այլ բան է հետաքրքրում: Ներկայիս իրավիճակի մասին իր գրված վերջին տեքստում Տեր-Պետրոսյանը համեմատեց Վազգեն Մանուկյանին և Նիկոլ Փաշինյանին՝ նշելով, որ ինչպես 1996-ին Մանուկյանը, այնպես և 2018-ին ՝ Փաշինյանը, «պատրաստ էին գնալ մինչև վերջ», պատրաստ էին «ամեն ինչի» ...

Մի կողմ թողնենք, որ 1996 թ.-ին Մանուկյանն այնքան քաղաքական գիտակցություն ուներ, որ կասեցրեց արյունահեղությունը:

Կարևորն այստեղ այն է, որ, խոսելով 1996-ի և 2018 թվականների մասին, Տեր-Պետրոսյանը շրջանցում է 2008 թվականի մարտի 1-ի իրողությունները:

Եթե Նիկոլ Փաշինյանն ավանտյուրիստ է ու պատրաստ է գնալ մինչև վերջ` իշխանությանն ամեն գնով հասնելու համար, ապա նա այդպիսին էր ոչ միայն 2018-ին, այլ նաև 2008 թվականին: Սա, իր հերթին, նշանակում է, որ Տեր-Պետրոյսանի թիմի անդամ Փաշինյանը 2008 թվականին գիտակցաբար տարավ բախումների, բարիկադների կառուցմանը, և շատ գիտակցաբար էր ասում, որ «քաղաքը պետք է ազատագրել ղարաբաղցի տականքներից»:

Սա, իր հերթին, նշանակում, որ Տեր-Պետրոսյանը շատ լավ տեղեկացված էր ոչ միայն Մարտի 1-ի իրողություններից, այլ նաև շատ լավ գիտակցում էր, որ Ռոբերտ Քոչարյանի դեմ իրականացվող հետապնդումը քաղաքական ֆարս էր: Սակայն անձնական հակակրանք ունենալով Քոչարյանի նկատմամբ, նա աչք էր փակում բացահայտ ապօրինությունների վրա:

Իհարկե, կարող ենք ենթադրել, որ այդ քայլով Տեր-Պետրոսյանը կոցկում էր նաև իր մեղքը Մարտի 1-ի ողբերգության համար, սակայն դա է՛լ ավելի է ծանրացնում իր մողքը:

Նախորդ հոդվածներից մեկում մենք ընդգծել ենք, որ ինչքան շատ այս օրերին Նիկոլ Փաշինյանը խոսի պատերազմի իրողությունների մասին, այդքան ավելի ամբողջական կդառնան իր կողմից իրականացված բոլոր սխալները, որոնք հանգեցրեցին պատերազմի, պատերազմում մեր պարտությանը, և Արցախի պետականության փլուզմանը: Նույն խորհուրդն էլ Տեր-Պետրոսյանին ենք տալիս. շատ խոսացեք, ձեր հանցանքների պատկերն ավելի ամբողջական եք դարձնում:

Սևակ Դանիելյան