ՍԴ-ն վարույթ է ընդունել սահմանադրական փոփոխությունների վերաբերյալ ԼՀԿ-ի և ԲՀԿ-ի դիմումը

Սահմանադրական դատդարանը վարույթ է ընդունել սահմանադրական փոփոխությունների վերաբերյալ «Լուսավոր Հայաստան» և «Բարգավաճ Հայաստան» խմբակցությունների ներկայացրած դիմումը, այս մասին ֆեյսբուքյան իր էջում տեղեկացնում է «Լուսավոր Հայաստան» խմբակցության ղեկավար Էդմոն Մարուքյանը։

«Հարգելի՛ հայրենակիցներ,

Տեղեկացնում եմ, որ Ազգային ժողովի պատգամավորների 1/5-ի կողմից Սահմանադրական դատարան ներկայացված դիմումն ընդունվել է քննության։

Դատաքննության օր է նշանակվել 2021թ. փետրվարի 09-ը, 11։00։

Դատարանը որոշել է դատաքննությունն անցկացնել գրավոր ընթացակարգով։

Որպես պատասխանող կողմ՝ ներգրավված են Հանրապետության նախագահը, Ազգային ժողովն ու կառավարությունը»,–գրել է պատգամավորը։

Հիշեցնենք, որ Ազգային ժողովն ընդունել էր սահմանադրական փոփոխությունների վերաբերյալ նախագիծ։ Գործընթացը, ըստ «Լուսավոր Հայաստան» խմբակցության պատգամավորների, տեղի է ունեցել խախտումներով, ինչի հիմքով խորհրդարանական ընդդիմադիր խմբակցությունները դիմել էին ՍԴ։