«Մենք հավաքվել ենք այստեղ, որպեսզի ազատվենք դավաճան Նիկոլ Փաշինյանից». «Եվրոնյուզի» անդրադարձը՝ Փաշինյանի հրաժարականի պահանջով բողոքի ցույցին. Տեսանյութ

«Եվրոնյուզ» հեռուստաալիքի ռուսական ծառայությունն անդրադարձել է Նիկոլ Փաշինյանի հրաժարականի պահանջով դեկտեմբերի 5-ին Երևանում տեղի ունեցած բողոքի ցույցին:

Հեռուստաալիքը կադրեր է ցուցադրել շաբաթօրյա բազմամարդ ցույցից և շեշտել, որ տասնյակ հազարավոր մարդիկ են դուրս եկել փողոց՝ իրենց բողոքը հայտնելու՝ ընդդեմ ներկայիս իշխանությունների: Հրապարակված կադրերում երևում են «Ստախոս» և «Սուրբը չգիդացող, թուրք Նիկոլ» գրառումներով պաստառները:

«Մենք հավաքվել ենք այստեղ, որպեսզի ազատվենք դավաճան Նիկոլ Փաշինյանից»,- ասել է ցույցի մասնակիցներից մեկը եվրոպական հեռուստաալիքին:

Ռեպորտաժում նշվում է, որ Փաշինյանին հեռանալու համար ժամանակ է տրվել մինչև դեկտեմբերի 8-ը:

Ռեպորտաժում նաև մեջբերում է արվում «Հայրենիքի փրկության շարժման» թեկնածու Վազգեն Մանուկյանի ելույթից, որում վերջինս ասում է, որ ինչքան շուտ Փաշինյանը հեռանա, այդքան լավ։

Մանրամասները տեսանյութում։ 

Հիշեցնենք, որ Նիկոլ Փաշինյանը նոյեմբերի 10-ին ստորագրել է եռակողմ հայտարարություն, որով Ադրբեջանին են անցնում Արցախի յոթ շրջանները, Շուշին ու Հադրութը, բացառությամբ մի գյուղի, գյուղեր Ասկերանի ու Մարտունու շրջանից, ինչպես նաև Մարտակերտի շրջանի Թալիշ և Մատաղիս գյուղերը։

Ըստ այդ հայտարարության՝ Լեռնային Ղարաբաղում շփման գծի երկայնքով և Լաչինի միջանցքի երկայնքով տեղակայվում է Ռուսաստանի Դաշնության խաղաղապահ զորախումբ, այդ թվում՝ հրաձգային զենքով զինված 1960 զինծառայող, 90 զրահամեքենա, 380 միավոր ավտոմոբիլային և հատուկ տեխնիկա: ՌԴ խաղաղապահների տեղակայումն Արցախում արդեն ավարտին է հասցվել: