Մենք պետք է կարճ ժամանակում ոտքի կանգնենք ու նորից մտնենք հաղթանակած ժողովուրդների շարքը. Վազգեն Մանուկյան. Տեսանյութ
Այսօր Ազատության հրապարակում ՀՀ վարչապետ Նիկոլ Փաշինյանի հրաժարականի պահանջով հանրահավաքի ընթացքում «Հայրենիքի փրկության շարժման» վարչապետի թեկնածու Վազգեն Մանուկյանը ներկայացրեց այն ծրագրային կետերը, որոնք պետք է իրականացնի նոր ձևավորվելիք ժամանակավոր կառավարությունը։
«Առաջին. մենք երբեք չենք հաշտվի այդ եռակողմ հայտարարության հետ, բայց այդ փաստաթուղթը դե ֆակտո աշխատում է։ Եվ մենք չենք կարող հրաժարվել դրանից, դա կնշանակի պատերազմ Ադրբեջանի ու Թուրքիայի հետ, ինչպես նաև խռովություն ռուսական խաղաղապահ զորքերի հետ։ Մենք հիմա Նիկոլի շնորհիվ նման քայլի համար ոչ մի վիճակ չունենք, սկի Սոթքը չենք կարողանում պահել։ Բայց այդ պայմանագիրը կազմված է բավականին փնթի, շատ բացթողումներ կան։ Նոր կառավարությունը պետք է կարողանա բանակցությունների միջոցով ամեն մի անորոշությունը դարձնել ի նպաստ հայերի։
Երկրորդ և ոչ պակաս կարևոր խնդիրը մեր անվտանգության հարցն է։ Մենք պետք է նորից վերականգնենք մեր բանակի մարտունակությունը, այն դարձնենք ժամանակակից բանակ։ Անվտանգության հարցի մեջ մտնում են նաև հատուկ հարաբերությունները Ռուսաստանի հետ։ Եթե դու Ռուսաստանի հետ չես կապված, ուրեմն մնում է Թուրքիան։ Բայց Ռուսաստանի հետ մենք ունենք բազում ընդհանուր շահեր, Թուրքիայի հետ՝ ոչ մի ընդհանուր շահ։ Ռուսաստանից բացի մենք էլի դաշնակիցներ ունենք, պետք է նրանց հետ հարաբերությունները վերականգնենք։ Թուրքիայի դեմ մեծ ուժ է հավաքվելու, աշխարհը չի ներելու Թուրքիային՝ իր լկտիությունը։ Եթե ստեղծվում է դաշինք Թուրքիայի դեմ, մենք այդ դաշինքի մեջ ենք։ Եվ, մենք նորից պետք է մտնենք բանակցային պրոցեսի մեջ, մեզ համար դա շատ կարևոր է»,- ներկայացրեց Վազգեն Մանուկյանը։
Երրոդ, բայց վարչապետի թեկնածուի խոսքով, խիստ կարևոր հարցը մեր անհայտ կորածների, գերիների ու վիրավորների, ինչպես նաև զոհված զինծառայողների ընտանիքներին և փախստականներին օգնելու հարցն է։
Ըստ Վազգեն Մանուկյանի, պետք է պայմաններ ստեղծվեն Արցախում, որպեսզի մեր ձեռքում եղած հատվածի բնակիչները կարողանան վերադառնալ իրենց տներ։
«Չորրորդ հարցը Հայաստանի մթնոլորտի առողջացումն է։ Դա միայն այն չէ, որ իրար հանդեպ պետք է բարի լինենք։ Հայաստանում գործում են արտաքին ազդեցություն ունեցող ուժեր, որոնք դիտավորյալ պառակտում են մեր ժողովրդին, իրենք մեր ժողովրդի միջոցով 2.5 տարի լուծում էին իրենց գեոպոլիտիկ հարցերը՝ մեզ օգտագործելով որպես խաղալիք։ Պետք է մաքրել այդ դաշտը, և մեր առջև ինչքան մեծ խնդիրներ դնենք, այդքան ավելի միասնական կլինենք։ Չփոքրացնենք խնդիրները, մենք մեր առջև դրված մեծ խնդիրները պետք է լուծենք։ Ամեն մի պարտությունից սկսվում է հաջորդ հաղթանակը, մենք կարճ ժամանակում պետք է ոտքի կանգնենք ու գնանք առաջ։ Խոչընդոտներ շատ կան, բայց հիմա գլխավոր խոչընդոտներից մեկը, որ թույլ չի տալիս մեր ժողովրդին առաջ գնալ, Նիկոլ Փաշինյանն է, ով պետք է հեռանա։ Թող հեռանա կամավոր, թե չէ կհեռանա զոռով»,- ներկայացրեց Վազգեն Մանուկյանը։
ՀՀ վարչապետի միասնական թեկնածուն խոսքն ավարտեց՝ վանկարկելով «Հաղթանակ»։
Հետևեք մեզ Facebook-ում