Եթե մենք որևէ պարագայում որևէ մեկի կողմից ընկալվենք որպես օկուպանտ, ընկալվելու ենք միայն Նիկոլ Փաշինյանի ստորագրած փաստաթղթի արդյունքում․ Կարեն Բեքարյան

Նիկոլ Փաշինյանն իր ամեն ավել մնացած րոպեով ու ժամով վնաս է տալիս այս պետությանը։ Այս մասին Նիկոլ Փաշինյանի հրաժարականի պահանջով հանրահավաքի ընթացքում Tert.am-ի հետ զրույցում ասաց հասարակական-քաղաքական գործիչ, վերլուծաբան Կարեն Բեքարյանը։

Դիտարկմանը, թե ըստ Փաշինյանի՝ 25 տարի Հայաստանն ընկալել են որպես օկուպանտ, Բեքարյանն արձագանքեց՝ դա, բացի նրանից, որ սուտ է, այլև հակապետական է։

«Նա չի հասկանում, որ խոսում է իր երկրի մասին։ Նա մի կողմից ուր ասես բարդում է պատասխանատվությունը, մյուս կողմից չի խորշում սեփական երկիրը ոտնատակ տալուց։ Եթե մենք որևէ պարագայում որևէ մեկի կողմից ընկալվենք որպես օկուպանտ, ընկալվելու ենք միայն իր ստորագրած փաստաթղթի արդյունքում»,-ասաց նա։

Ըստ Բեքարյանի՝ Փաշինյանը քայքայել է պետության, պետականության, հնարավոր բոլոր հիմքերը։

«ՀՀ-ն իր անկախությունից ի վեր հետևողական բանակցություններ է վարել արցախյան կարգավորման գործընթացում։ Այդ բանակցությունները ոչ միշտ են եղել մեզ համար շատ դրական փաթեթների շուրջ, բայց արվել է ամենակարևորը՝ յուրաքանչյուր հաջորդը փորձել է նախորդի արածի վրա մի քար ավելացնել, վիճակն ավելի բարելավել»,-ասաց նա՝ նշելով, Նիկոլ Փաշինյանը որոշել է ամեն ինչ սկսկել զրոյական կետից։

«Նա այնքան է անլրջացրել իրեն ու իր անձով՝ երկիրը, բանակցային գործընթացը, ամեն ինչ այնպես է քայքայել, որ այս երկրի ձայնը չկա որևէ կերպ»,-նշեց նա՝ հավելելով, թե զարմանում է, որ դեռ մարդիկ կան, որ փորձում են Փաշինյանի հայտարարություններում բովանդակություն տեսնել։

«Նա պրոֆեսիոնալ է երկու բանում՝ ստախոսության և քանդելու մեջ։ Նրա՝ ամեն ժամ ավել մնալն այս երկրի հիմքերին աննկարագրելի հարված է»,-ասաց Կարեն Բեքարյանը։

Մանրամասները՝ Tert.am-ի տեսանյութում