Փաշինյանը մեղադրում է հայերին, ասում է՝ մեղավոր եք, որովհետև հայ եք, եթե 451-ի Ավարայրը չլիներ, 2020-ին Ղարաբաղը չէր հանձնի. Արմեն Մինասյան. Տեսանյութ

Նիկոլ Փաշինյանի ուղերձում պատասխանատվությունը թողնվում է ժողովրդի վրա, հայի վրա, եթե մեկ նախադասությամբ թարգամանենք, թե ինչ է ասում, ապա կստացվի՝ դուք մեղավոր եք, որովհետև հայ եք, ըստ նրա, եթե 451 թվականին չլիներ Ավարայրի ճակատամարտ, 2020 թվականին ինքը Ղարաբաղը չէր տա: Այս մասին Ազատության հրապարակում Tert.am-ի հետ զրույցում ասաց քաղաքագետ Արմեն Մինասյանը՝ անդրադառնալով Նիկոլ Փաշինյանի ուղերձին:

Նրա խոսքով՝ այսօր քաղաքացիներն ունեն մեկ խնդիր՝ տեր կանգնել պետությանը, այդ կերպ տեր կանգնել սեփական իրավունքներին: «Այսօր մենք ունենք խնդիր՝ ունենալ կառավարություն, որ զբաղվի գերիների, ՀՀ սահմանների, ՀՀ քաղաքացիների անվտանգության և իրավունքների հարցերով: Մենք տեսնում ենք, որ այսօր չկա որևէ պետական մարմին, որին կարող ենք դիմել և ստանալ ողջամիտ պատասխան մեր իրավունքների պաշտպանության վերաբերյալ: Ունենք անհետ կորածներ, գերիներ, և Փաշինյանի որևէ բացատրություն այլևս տեղին չէ պատերազմական գործողություններից մեկ ամիս անց, դա տեխնիկական հարց էր, որ պետք է վաղուց լուծած լիներ, եթե չի կարողանում լուծել, ուրեմն ի վիճակի չէ»,- հայտարարեց քաղաքագետը:

Նա հավելեց, որ Նիկոլ Փաշինյանը պետք է հեռանա որպես կապիտուլացված իշխանության ղեկավար, որպես երկրի ղեկավար՝ նա զիջել է հակառակորդին այն ամենը, ինչ ցանկացել է  հակառակորդը, որևէ կետում չի ասել՝ ոչ, հետևաբար հույս ունենալ, թե Փաշինյանը այսհուհետ որևէ հարց կլուծի, անիմաստ է. «Այսօր ՀՀ մտահոգ քաղաքացին, պարզապես պետք է դնի այդ խնդիրը, որ օր առաջ Փաշինյանը հեռանա, տեղը տա ազգային համաձայնության կառավարությանը: Այսօր ոչ միայն ընդդիմութունը, այլև հասարակությունն ունի կոնսենսուս: Նիկոլ Փաշինյանն ու իր թիմը պետք է հասկանան՝ ճիշտն առանց ցնցումների հեռանալն է, դա վաղ թե ուշ տեղի է ունենալու»:

Քաղաքագետը նշեց, որ առայժմ տեսնում է դիմադրություն, տեսնում է փորձ՝ մնալու այդ աթոռներին կառչած, բայց վստահ է՝ հանրությունը կարող է ճնշում գործադրել: «Մենք տեսնում ենք ԳԱԱ-ի, Համալսարանի, տարբեր ՏԻՄ-երի հայտարարություններ հրաժարականի պահանջով, այս ամեն ինչը տալու է պտուղը»,- ընդգծեց նա:

Մանրամասները՝ Tert.am-ի տեսանյութում: