«Կամ-կամ». Նիկոլը կանգնած է ևս մեկ, բայց իր համար վերջին և ամենակարևոր ընտրության առջև

Յուրաքանչյուր քաղաքական գործիչ իր կյանքում շատ կարևոր որոշումներ է կայացնում, որոնք փոխում են իր և մի ամբողջ երկրի ու սերնդի կյանք:

Վարչապետ Փաշինյանին չի կարելի համեմատել այնպիսի ականավոր անհատականությունների հետ, ինչպիսիք են, օրինակ, Ուինսթոն Չերչիլը, որը փոխեց շատ կուսակցություններ, բայց ճիշտ ժամանակին, լինելով պետության ղեկին, օգնեց հաղթել համաշխարհային չարիքը` նացիզմը:

Փաշինյանը, փոխելով բազմաթիվ «տերերի» ու հասնելով վարչապետի պաշտոնին, ստիպված էր մի շարք որոշումներ կայացնել, որոնք կփոխեին ինչպես իր կյանքը, այնպես էլ մեր երկրի կյանքը:

Նիկոլը կարող էր կառուցել սիրո և հանդուրժողականության հասարակություն, բայց որոշեց հասարակությունը բաժանել «սևի» և «սպիտակի»: Այսպիսով բոլորիս խեղդելով ատելության մեջ:

Նիկոլը կարող էր որոշում կայացնել և բոլոր քաղաքական ուժերի հետ միասին իրականացնել «տնտեսական հեղափոխություն» և երկիրը բերել զարգացման նոր մակարդակի: Փոխարենը, նա ոչնչացրեց մեր տնտեսությունը և դատապարտեց քաղաքացիներին երկար տարիներ ապրել աղքատության մեջ:

Նիկոլը խոստացավ բարձրացնել Հայաստանի ինքնիշխանությունը, բայց դրա փոխարեն այսօր, առանց մեզ, Ադրբեջանն առաջարկում է Ռուսաստանին և Թուրքիային օգտագործել մեր տարածքը և կառուցել նոր տրանսպորտային համակարգեր: նիկոլը Հայաստանը միջազգային հարաբերությունների սուբյեկտից վերածեց օբյեկտի:

Նիկոլը խոստացավ Արցախը բերել բանակցությունների սեղանի շուրջ, բայց փոխարենը որոշեց նրան մենակ թողնել Ադրբեջանի և Թուրքիայի դեմ պատերազմում:

Պատերազմի օրերին Նիկոլին օգնություն էին առաջարկում բոլորը՝ ՌԴ նախագահ Վլադիմիր Պուտինից մինչև Արցախի և Հայաստանի նախկին նախագահ Ռոբերտ Քոչարյան, Հայաստանի երրորդ նախագահ Սերժ Սարգսյանից մինչև Արցախի նախկին նախագահ Բակո Սահակյան: Ռուսաստանի հայերից մինչև Ավստրալիայի մեր հայրենակիցները: Բայց Փաշինյանը մերժեց ցանկացած օգնություն:

Նա որոշեց, որ իր իշխանությունը չպետք է վտանգի ենթարկվի, նա որոշեց, որ ոչ ոքի պարտավոր չպիտի լինի պատերազմում փրկության համար և դրա պատճառով մենք կորցրեցինք երկրորդ հայկական պետականությունը:

Այսօր Փաշինյանը կանգնած է ևս մեկ, բայց իր համար վերջին և ամենակարևոր ընտրության առջև:

Նա կա՛մ ապահովում է իշխանության անարյուն փոխանցումը, որը բխում է իր շահերից և Հայաստանի շահերից: Կա՛մ նա գնում է ցնցումների, որոնք վտանգավոր են երկրի և իր համար, իր շրջապատի համար:

2,5 տարի նմանատիպ ընտրությունների առաջ կանգնած Փաշինյանը սխալվում էր: Հիմա նա սխալվելու իրավունք և տեղ չունի:

Սևակ Դանիելյան