The New York Times. Լեռնային Ղարաբաղի մասին փաստաթղթում Պուտինը կիրառեց նոր մոտեցում. Ղարաբաղցիները շուտով կստանան ռուսական անձնագրեր

Ամերիկյան հեղինակավոր The New York Times-ը Արցախի վերաբերյալ մեծ վերլուծություն է հրապարակել: 

Հոդվածի հեղինակները նշում է, որ նոյեմբերի 10-ի համաձայնագիրը ոչինչ չի ասում Լեռնային Ղարաբաղի երկարաժամկետ կարգավիճակի մասին, իսկ էթնիկ հայերը, ովքեր վերադառնում են իրենց տները ռուս խաղաղապահների վերահսկողության ներքո, ասում են, որ չեն պատկերացնում տարածաշրջանում կյանքն առանց Ռուսաստանի պաշտպանության: «Մենք շուտով կստանանք ռուսական անձնագրեր: Մենք չենք կարող գոյատեւել առանց Ռուսաստանի»:

«Երկաթե բռունցքի» մարտավարությունը, որը Ռուսաստանը կիրառեց Վրաստանի ու Ուկրաինայի դեմ, ակնհայտորեն զիջել է իր դիրքերը և ՌԴ-ն փոխարինվել է այն «փափուկ ուժի» և թաքնված ռազմական սպառնալիքի ավելի հմուտ խառնուրդով:

Խաղաղության այս փաստաթուղթը Ալիեւը ներկայացնում է որպես հաղթանակ, քանի որ Ադրբեջանին հաջողվեց ստանալ Լեռնային Ղարաբաղի գրեթե բոլոր տարածքները:

Սակայն նա նույնպես ստիպված էր փոխզիջման գնալ. այժմ Ադրբեջանի տարածքում կգտնվի գրեթե 2000 հոգանոց ռուսական զորք, որը կիրականացնի խաղաղապահների գործառույթ: Սա իսկական ռազմավարական հաղթանակ էր Ռուսաստանի համար, քանի որ Մոսկվան ռազմական ներկայություն ապահովեց նաեւ Իրանի անմիջապես հյուսիսում:

Այնուամենայնիվ, ՌԴ նախագահ Վլադիմիր  Պուտինի հետ այս գործարքն ակնհայտորեն շահավետ է Ալիևին: Որոշ վերլուծաբաններ նշում են, որ մասամբ դրանով էր պայմանավորված, որ նոյեմբերի սկզբին ադրբեջանական զորքերը գործում էին իրենց ուժերի լարման վերին սահմաններում, նրանց դեմը ձմեռ էր:

«Չեմ կարծում, որ Ալիևին համոզելը երկար տևեց», - ասաց Քարնեգի Եվրոպական կենտրոնի ավագ գիտաշխատող Թոմաս դե Վաալը: «Նա գնահատում է իր հարաբերությունները Ռուսաստանի հետ»:

Zham.am