ԱՄՆ դեսպանատան հայտարարությունը՝ «ՍԱՍ»-ում հայտնի ձայնագրության վերաբերյալ

Հայաստանում ԱՄՆ դեսպանատունը հաղորդագրություն է տարածել, որում ասված է.

«Վերջերս կայացած խորհրդարանական ընտրություններից հետո ԱՄՆ-ի և միջազգային կառույցների կողմից հայտարարություն եղավ, որում նշվում էր, որ ընտրական գործընթացների վրա բիծ են թողել քվեներ գնելու և ընտրողների նկատմամբ ճնշումներ գործադրելու մասին արժանահավատ հաղորդումները:

Հայտարարությամբ մենք Հայաստանի կառավարությանը, կուսակցություններին ու քաղաքացիական հասարակությանը հորդորում էինք աշխատել միասին՝ գոյություն ունեցող կամ նոր իրավակիրառ մեխանիզմների միջոցով փարատելու այդ մտահոգությունները, և մենք ողջունում ենք Գլխավոր դատախազի այսօրվա հայտարարությունը, որ Hayastan24-ի կողմից կարճ ժամանակ առաջ հրապարակված խիստ մտահոգիչ նյութի հիման վրա քննություն է սկսվել:

Այս բնույթի արժանահավատ ու թափանցիկ քննությունները համահունչ են փետրվարի 9-ին վարչական ռեսուրսի օգտագործման դեմ Վարչապետի հնչեցրած նախազգուշացման հետ: Մենք հավատացած ենք, որ կառավարությունը կապահովի, որպեսզի չլինեն հակընդդեմ մեղադրանքներ կամ հաշվեհարդար որևէ անձի կամ կազմակերպության դեմ, որը քննության կներկայացնի արժանահավատ տեղեկություններ»:

Հիշեցնենք, որ երեկ «Hayastan24.com» կայքը հրապարակել է մի ձայնագրություն, որտեղ «ՍԱՍ» գրուպի ղեկավարներից մեկը նախընտրական ժողովի է հրավիրել ընկերության աշխատակիցներին։ 

Ձայնագրության մեջ «ՍԱՍ» գրուպի ղեկավարներից մեկը հատ առ հատ քննարկում է աշխատակիցների բերած ձայները, հրահանգում նոր ձայներ բերել, հնչեցնում սպառնալիքներ ու, մեղմ ասած, ստորացնում աշխատակիցներին: Այս ամենին զուգահեռ աշխատակիցների կողմից հնչում են ծափահարություններ, ինչպես նաև «արդարացումներ», թե ինչու են օրինակ՝ 0 ձայն բերել ԱԺ պատգամավոր Արտակ Սարգսյանին՝  «ՍԱՍ»-ի Արտակին: