«Գտնվել է» ՀՀԿ-ին ծառայություններ մատուցող «արջը»

Համացանցում բուռն քննարկումների է արժանացել մի ձայնագրություն, որում ներկայացվում է, թե ինչպես է մինչև ԱԺ ընտրությունները «ՍԱՍ» գրուպի աշխատակիցներին մեկ տեղում հավաքել և ցուցակագրել այն ձայները, որոնք իրենց կարող էին ապահովել ՀՀԿ-ի կողմից պատգամավորի թեկնածու առաջադրված «ՍԱՍ»-ի հիմնադիր Արտակ Սարգսյանի համար:

Հրապարակված ձայնագրությունը մի քանի հետաքրքիր նրբերանգներ է իր մեջ պարունակում, որոնց էլ կանդրադառնանք այս հոդվածում:

Առաջին

Բոլորիս համար էլ պարզ է, որ նույն մեթոդով աշխատել են ոչ միայն ՀՀԿ-ի այլ ռեյտինգային թեկնածուները, այլև բոլորիս արդեն քաջ ծանոթ դպրոցի տնօրենները, ովքեր «ոչ աշխատանքային» ժամերին զբաղված են Հանրապետական կուսակցության համար ձայներ հավաքագրելով: Բայց որոշում է կայացվել մնացած ռեյտինգային պատգամավորներին և դպրոցի տնօրեններին թողած զբաղվել «ՍԱՍ»-ում տեղի ունեցած խայտառակությամբ: Հետաքրքիր է նաև, որ դեպքին անմիջապես արձագանքեց Դատախազությունը՝ տարածած հայտարարության մեջ նշելով, որ ուսումնասիրում են խնդիրը:

Այս պահին կարելի է միայն ենթադրել, որ հնարավոր է գործի ետևում կարող է լինել սեփականության վերաբաշխման նպատակ: Այդպես է դա թե ոչ, կերևա առաջիկայում:

Երկրորդ

Հաջորդ հետաքրքիրն նրբերանգն այն է, որ Բաղրամյան 26-ի ոչ պաշտոնական մամուլի ծառայություն հանդիսացող լրատվական կայքերից մեկը կատարվածի կապակցությամբ վերլուծական է հրապարակել, որում չի էլ թաքցնում այն, որ հիշյալ ձայնագրությունը հրապարակվել է Հանրապետականի ռեյտինգային թեկնածուներին ցույց տալու համար, որ իրենք բոլորն էլ շատ խոցելի են և ցանկացած պահին իրենց դեմ ևս կարող է նյութ հրապարակվել, որից պարզ կդառնա, որ ՀՀԿ-ին «արջի ծառայություն» մատուցող անձերից մեկը հենց իրենք են:

Երրորդ

Կատարվածն ինքնին արժանի է դատապարտման և հենց նման միջոցառումների պատճառով Հայաստանում ընտրական համակարգը դադարել է գոյություն ունենալ: Սակայն, իրականությունն այն է, որ ռեյտինգային համակարգի ներդրումը կատարվել է բացառապես Բաղրամյան 26-ի ցանկությամբ և պնդմամբ, քանզի այնտեղ հասկացել են, որ առանց այդ համակարգի հնարավոր չէ 50 + 1 տոկոս խփել ՀՀԿ-ի համար, իսկ հիմա, երբ տոկոսներն արդեն խփված են, կարելի է ներիշխանական վերադասավորումներով զբաղվել, և թող ոչ ոք չզարմանա, եթե վաղը-մյուս օրը «անհայտ անձինք» շարունակեն նման ձայնագրություններ ներկայացնել հանրության դատին:

Սևակ Դանիելյան