Չինական համազգեստավորները «մտան» կառավարության շենք

Նիկոլ Փաշինյանի կողմից ստորագրված ամոթալի փաստաթղթից հետո (որն, ի դեպ, ըստ ՌԴ նախագահ Վլադիմիր Պուտինի, հենց Փաշինյանն ինքն էլ կազմել է Ալիեւի հետ), երկրում ամեն օր քաղաքական լարվածությունը միայն աճում է:

Նման պայմաններում պարզ է, որ Փաշինյանն առաջին հերթին մտածում է իր անվտանգության մասին և փորձում է «դաշնակիցներ գտնել», որոնք թույլ կտան իրեն լուծել այս հարցը: Միաժամանակ, Փաշինյանը հասկանում է, որ չի կարող հույս դնել Ազգային ժողովում իր խմբակցության վրա:

Պատերազմից առաջ էլ նրանք բազմիցս փորձում էին «բաժանվել Փաշինյանից», իսկ հիմա արդեն տեղեկություններ կան, որ իշխող խմբակցության պատգամավորները շտապում են լուծել իրենք իրենց հարցերը, և դրա համար նրանք փորձում են վիզաներ ստանալ, և հիմնականում` վիզաներ դեպի ԱՄՆ:

Ակնհայտ է, որ նման «աջակցությունը» չի փրկի Փաշինյանի իշխանությունը և չի ապահովի նրա անվտանգությունը: Ոչ էլ Նիկոլ Փաշինյանին կօգնեն «փողոցը» (որը նա կորցրել է շատ վաղուց), պետական ապարատը կամ արտաքին ուժերը:

Մոսկվային Փաշինյանը պետք է միայն մինչեւ դեկտեմբերի 1-ը, որպեսզի նա կարողանա «իր ձեռքերով» ավարտել իր իսկ կողմից սկսած «կեղտոտ գործը», իսկ Արեւմուտքը «կօգնի» Փաշինյանին ճիշտ այնպես, ինչպես նա «օգնեց» պատերազմի ժամանակ… Այս պայմաններում Փաշինյանը հուսահատորեն աջակցություն է փնտրում, և, ըստ երեւույթի, որոշ չափով գտել է:

Նիկոլ Փաշինյանը աջակցություն գտավ ի դեմս հայ օլիգարխների: Սկզբում նրանք նրան «հուսալի թիկունք» էին ապահովում փողոցում, երբ ցուցարարներին սկսեցին ցրել չինական համազգեստով անհասկանալի տարրեր, և մամուլն անմիջապես գրեց, որ «չինական համազգեստով դիմակավորված անձինք, ոչ թե ոստիկանության ծառայողներ են, այլ տարբեր օլիգարխների թիկնազորի անդամներ»: Իսկ, ահա, այսօր «չինական համազգեստով մարդիկ» արդեն «մուտք են գործել» կառավարության շենք և հանդիպում անցկացրել դեռ վարչապետ Փաշինյանի հետ:

Իրավիճակը Փաշինյանի համար իսկապես կրիտիկական է, այդ իսկ պատճառով նա ստիպված է այդքան բացահայտ ցույց տալ հասարակությանը, ընդդիմությանը, պետական ապարատին այն ուժերը, որոնց վրա նա «կհենվի» առաջիկա քաղաքական գործընթացներում:

Այս առումով Նիկոլ Փաշինյանին պետք է 2 բան ասել.

1. 2008-ին ասացիք, որ «օլիգարխների թիկնապահները փողոց են դուրս եկել ժողովրդի դեմ»: Բայց հենց հիմա դուք եք դա անում:

2. Այն մարդիկ, ում հետ հանդիպել եք նախկիններին «համապատասխան պահին դավաճանել են»: Նույն բանը սպասում է ձեզ:

Բայց օլիգարխների հետ Նիկոլ Փաշինյանի այսօրվա հանդիպմանը ուշագրավ էր նաեւ այն, որ 2018-ին Փաշինյանը ժողովրդին դուրս բերեց փողոց հենց հակաօլիգարխիկ կարգախոսներով ՝ խոստանալով «վերադարձնել թալանվածը»: Իսկ այսօր Փաշինյանը ցանկանում է այս նույն օլիգարխների միջոցով պաշտպանվել ժողովրդից...

Օ՜ ժամանակներ, օ՜ բարքեր

Սևակ Դանիելյան