ՀՅԴ-ն և ՀՀԿ-ն բանակցում են նոր կոալիցիա ստեղծելու շուրջ

Առայժմ հստակ է մեկ բան՝ վարչապետ Կարեն Կարապետյանն իր պաշտոնը կպահպանի նաև նոր կառավարությունում։

ՀՀԿ և ՀՅԴ կուսակցությունները կոալիցիա կազմելու շուրջ ընթացող բանակցություններից շատ քիչ մանրամասներ են հայտնում։ Հանրապետական-Դաշնակցություն գործող համաձայնագրով ՀՅԴ-ն այժմ գործադիրում երեք նախարարական պորտֆել ունի, իսկ թե ինչ կստանա նոր համաձայնագրով՝ կորոշվի բանակցությունների արդյունքում։

Դեռ պարզ չէ, թե երբ կավարտվեն երկու ուժերի քննարկումները: «Ազատության» հարցին՝ արդյո՞ք բանակցությունների ընթացքում խնդիրներ են առաջացել, ՀՀԿ փոխնախագահ Արմեն Աշոտյանն այսպես արձագանքեց․ «Ես հասկանում եմ, որ ձեզ խնդիրներ են պետք, այս պահին չեմ կարող ձեզ ուրախացնել»:

Հանրապետական կուսակցության փոխնախագահի խոսքով, հնարավոր կոալիցիան նախևառաջ քաղաքական որոշման արդյունք է լինելու։ Խորհրդարանական ընտրություններում ՀՀԿ-ն Ազգային Ժողովում մեծամասնություն ստացավ և, ըստ էության, կարող է միայնակ էլ կառավարություն կազմել, մինչդեռ, ՀՀԿ փոխնախագահն ասում է, թե որոշ դեպքերում խորհրդարանում իրենց ավելի շատ ձայներ են պետք լինելու։

«Նոր Սահմանադրությամբ, մի շարք կարևորագույն օրենքներ պահանջում են նոր քանակական ցենզ՝ երեք հինգերորդ, դա նշանակում է առնվազն 60 տոկոս ձայն: Հետևաբար, կա նաև, որոշ դեպքերում, նման համագործակցության սահմանադրական պահանջ»,- պարզաբանեց Աշոտյանը:

Դաշնակցության հետ այժմ բանակցում են Հանրապետականի գործադիր մարմնի մի քանի անդամներ, թե կոնկրետ ովքեր՝ Արմեն Աշոտյանը չհստակեցրեց: Բանակցող մյուս կողմը՝ Դաշնակցությունն առայժմ լռում է: ՀՅԴ ներկայացուցիչ Աղվան Վարդանյանն ասաց՝ երեկ այս թեմային արդեն անդրադարձել է «Երկիր Մեդիայի» եթերում։

Այդ հարցազրույցում Վարդանյանն ասել էր՝ թեև բանակցությունները նախնական փուլում են, բայց Դաշնակցությունն ու Հանրապետականն «իրար շատ արագ են հասկանում»։ Այժմ էլ քննարկում են ոչ թե պաշտոնների, այլ երկրի ապագայի հարցը։ Այն գնահատականներն էլ, թե ՀՅԴ-ն Հանրապետականի կցորդն է, Վարդանյանը «զառանցանք» էր համարել։

«Դաշնակցությունը երբեք որևէ քաղաքական ուժի՝ իշխանության կամ ընդդիմության, չգիտեմ, գերակա ուժի կցորդ չի եղել ու չի լինելու: Թող որևէ մեկը նման հալյուցինացիաներ չունենա: Դաշնակցությունն իր ինքնուրույն, անկախ քաղաքականությունն ունի, իր սկզբունքներն ունի, որից երբեք չի հրաժարվել»,- ասել էր Աղվան Վարդանյանը:

Շարունակությունը՝ սկզբնաղբյուր կայքում