Խայտառակություն է, երբ այլ պետության ղեկավարը խոսում է Հայաստանի ղեկավարի՝ դավաճան չլինելու մասին. Արթուր Ղազինյան
Այս հրավերներն ուղիղ կապված է մեր կողմից կազմակերպվող զանգվածային միջոցառումների հետ։ Այս մասին այսօր՝ նոյեմբերի 18-ին, լրագրողների հետ զրույցում ասաց «Մեկ Հայաստան» կուսակցության նախագահ Արթուր Ղազինյանը, որին քիչ առաջ ՀՔԾ-ում մեղադրանք առաջադրվեց։
«Կարծես՝ իշխանությունը չի ուզում, որ որեւէ բան փոխվի այսօր Հայաստանի Հանրապետության համար, հնարավոր բոլոր միջոցներով խոչընդոտում է մեր կողմից իրականացվող գործունեությունը»,- նշեց նա։
Ըստ Ղազինյանի՝ Նիկոլ Փաշինյանը կոմպետենտ չէ, նա չի ներկայացնում ՀՀ շահը, ՀՀ ժողովրդին ունի լեգիտիմության առումով լուրջ խնդիրներ ու վարչապետ չի հանդիսանում լեգիտիմության առումով:
««Իմ քայլը» պետք է պատասխանատվություն ստանձնի ստեղծված իրավիճակի համար: Ամեն օր ուշացնելով, հետաձգելով ու ամեն գնով կառչած մնալով իշխանությունից նրանք ուղղակի իրենք իրենց մղում են դեպի անդունդ, դեպի փակուղի` դրանով ստանձնելով ամբողջ պատասխանատվությունը` անձնական, քաղաքական, նաեւ` քրեաիրավական»,- նշեց Ղազինյանը:
Անդրադառնալով ՌԴ նախագահ Վլադիմիր Պուտինի երեկվա հարցազրույցին, որում խոսք գնաց նաեւ վարչապետ Նիկոլ Փաշինյանի՝ դավաճան լինել, չլինելու մասին՝ Ղազինյանն ասաց. «Խայտառակություն է, երբ այլ պետության ղեկավարը խոսում է Հայաստանի Հանրապետության ղեկավարի՝ դավաճան չլինելու մասին»։
Zham.am