«Ադրբեջանին տվեցիր այն բոլոր հողերը, որտեղ կինդ լուսանկարվեց». Իվետա Տոնոյան. Տեսանյութ
Մեր թասիբը, մեր սկզբունքները, մեր հայացքները մեզնից ոչ ոք չի վերցնելու: Երեկվանից հանրապետության գլխավոր թյուրիմացությունը, հանրապետության գլխավոր, գերագույն չարիքը իր մտաժայթքումներն է սփռում ֆեյսբուքյան հարթակում, իր ատելության, մաղձի, չարության հերթական չափաբաժինը հրամցնում է հասարակությանը, դեռևս պարզ չէ՝ ինչի ազդեցության տակ: Այս մասին Ազատության հրապարակում Նիկոլ Փաշինյանի հրաժարականի պահանջով հանրահավաքի ընթացքում հայտարարեց ԱԺ «Բարգավաճ Հայաստան» խմբակցության պատգամավոր Իվետա Տոնոյանը:
Ըստ Տոնոյանի՝ Փաշինյանը հերթական անգամ հասարակությունը բաժանում է «սևերի» և «սպիտակների», հասարակության մեջ սերմանում է անհանդուրժողականության, ատելության գաղափարներ, և այսքան բանից հետո, ըստ պատգամավորի, համարձակություն է ունենում հայտարարել, թե ընդդիմությունը թող ասի, որ զենքի միջոցով պատրաստ չէ բախումներ հրահրել:
Պատգամավորը, դիմելով, վարչապետին, հայտարարեց. «Լավ, դու ընդհանարապես ամոթ չունե՞ս: Մենք այսօր հանդես ենք գալիս համերաշխության դիրքերից, միակ պահանջը քո անցնցում հեռացումն է, բայց դու քո աթոռը պահելու համար պատրաստ ես քո հայրենակիցների արյունը թափել, հրահրել քաղաքացիական պատերազմ, զոհասեղանին դնել մեզանից յուրաքանչյուրի կյանքը, բայց անգամ դա քեզ չի փրկելու»:
«Ես հասկանում եմ, որ արյան ծարավը պատել է քեզ, որ արնախումի նման չես բավարարվում մեր հազարավոր զինվորների կյանքից զրկելով, որ ատելության և անհանդուրժողականության մթնոլորտի տարածումը քո ուղենիշն է, բայց խիղճ ունեցիր, Եռաբլուրում դեռ չի չորացել մեր հազարավոր զինվորների գերեզմանների վրայի հողը: Քո վերջն այլևս եկել է, դու պետք է գնաս, և այդ պահանջը ձևավորված է հարյուր հազարավոր հայրենակիցների մտքում»,– հավելեց պատգամավորը:
Մանրամասները՝ 168.am-ի տեսանյութում:
Հետևեք մեզ Facebook-ում