Վահրամ Բաղդասարյանի ձերբակալությունը ոչ իրավաչափ է․ Փաստաբան

Երևանի ընդհանուր իրավասության դատարանի Շենգավիթի նստավայրում այսօր՝ ժամը 18։30-ն կքննվի ՀՀԿ անդամ Վահրամ Բաղդասարյանի նկատմամբ կալանքը որպես խափանման միջոց ընտրելու հարցը։ Այս մասին այսօր լրագրողներին ասաց Վահրամ Բաղդասարյանի փաստաբան Վահագն Գասպարյանը։

Վահրամ Բաղդասարյանին մեղադրանք է առաջադրվել Քրեական օրենսգրքի 35-300-րդ հոդվածի 1-ին մասի (իշխանության յուրացման), 35-305-րդ  (պետական, քաղաքական կամ հասարակական գործչի գործունեությունը դադարեցնելու նպատակով սպանության նախապատրաստման) հոդվածների կասկածանքով։

Անդրադառնալով ԱԱԾ հրապարակած ձայնագրությանը՝ փաստաբանն ասաց․ «Որ փորձեք առանձին լսել, ոնց որ իրենք են ասում՝ պարոն Բաղդասարյանի կապն ընդհանրապես էս գործի հետ չկա։ Այնտեղ խոսվում է հավաքների մասին։ Եթե հավաքներին մասնակցելը կամ կազմակերպելը իշխանության յուրացում է կամ իշխանության ներկայացուցչի սպանության նախապատրաստում, ես բան չունեմ ասելու։ Դա իրավաբանություն չէ, այսինքն՝ իրավական հիմնավորում դա չունի։ Ցանկացած հանցագործության նախապատրաստումը ենթադրում է կոնկրետ անձի գործողություններ։ Մեր համար մինչև հիմա պարզ չէ, թե պարոն Բաղդասրայանն ինչ է կատարել»,- ասաց փաստաբանը։

Փաստաբանը նաև ասաց, որ Բաղդասարյանի տանը խուզարկություն է կատարվել, ընդամենը 2011 թվականին ծննդյան օրվա կապակցությամբ նվեր ստացած օրինական զենք է հայտնաբերվել։ Նա ասաց, որ Բաղդասարյանի ձերբակալությունը ոչ իրավաչափ է։