Ղարաբաղում ռուս խաղաղապահների հրամանատարը պատմել է իր ազգության մասին

Լեռնային Ղարաբաղում ռուս խաղաղապահների խմբավորման հրամանատար գեներալ-լեյտենանտ Ռուստամ Մուրադովը հայտնել է, որ ծնվել է Դաղստանում և ազգությամբ թաբասարանցի է: Այս մասին հայտնում է Tert.am-ը՝ ТАСС գործակալությանը հղելով:

Ավելի վաղ համացանցում ակտիվ քննարկվում էր այն հարցը, թե ռուս խաղաղապահների հրամանատարը ԼՂ-ում ադրբեջանցի է:

«Ինչ վերաբերում է իմ ազգային պատկանելիությանը, եթե հետաքրքիր է, ես ծնվել եմ Դաղստանի Հանրապետությունում, ազգությամբ թաբասարանցի եմ: Հարևան պետության հետ ազգակցական որևէ առնչություն չունեմ»,- ասել է Մուրադովը:

Վերջինս ընդգծել է, որ իր համար՝ որպես սպայի, ազգային պատկանելիություն գոյություն չունի. ինքն իր առաջադրանքները կատարում է, ինչպես նախատեսված է: Մուրադովն ընդգծել է, որ գլխավոր հրամանատարի և ՌԴ պաշտպանության նախարարի, ինչպես նաև անմիջական ղեկավարների հրամաններն իր համար ենթակա են կատարման:

Հիշեցնենք, որ նոյեմբերի 9-ին Ռուսաստանի, Հայաստանի և Ադրբեջանի ղեկավարները Լեռնային Ղարաբաղում ռուս խաղաղապահների տեղակայման շուրջ պայմանավորվածություն են ձեռք բերել, ստորագրվել է հայտարարություն:

Ռուս խաղաղապահների մի մասն արդեն Արցախում է։ Նոյեմբերի 11-ին ՀՀ պաշտպանության նախարար Դավիթ Տոնոյանն ընդունել է Լեռնային Ղարաբաղի հակամարտության գոտում հրադադարի ռեժիմի վերահսկման նպատակով ժամանած ՌԴ խաղաղապահ զորակազմի հրամանատար, գեներալ-լեյտենանտ Ռուստամ Մուրադովին: Հանդիպմանը քննարկվել են խաղաղապահ առաքելության կազմակերպման և իրականացման հարցեր։

Ավելի վաղ Ռուսաստանի պաշտպանության նախարար Սերգեյ Շոյգուն հայտնել էր, որ ռազմական տրանսպորտային ավիացիան 3 օրվա ընթացքում Լեռնային Ղարաբաղ է տեղափոխել 1103 զինծառայող և 168 միավոր տեխնիկա:

Աղբյուր՝ Tert.am