Պուտինը նշել է Ղարաբաղում խաղաղ կյանքին վերադառնալու կարեւորությունն եւ հրահանգել է Արցախի համար մարդասիրական կենտրոն ստեղծել. Տեսանյութ

Լեռնային Ղարաբաղի հարցով Հայաստանի, Ադրբեջանի եւ Ռուսաստանի առաջնորդների համատեղ հայտարարությունը թույլ տվեց կանգնեցնել արյունահեղությունն ու կայունացնել իրավիճակը տարածաշրջանում: Այս մասին ԼՂ-ում հումանիտար հարցերի լուծման վերաբերյալ խորհրդակցության ժամանակ հայտարարել է ՌԴ նախագահ Վլադիմիր Պուտինը, հաղորդում է «ՌԻԱ Նովոստի»-ն:

«Նոյեմբերի 9-ին Ադրբեջանի նախագահի, Հայաստանի վարչապետի եւ Ռուսաստանի նախագահի կողմից ընդունված եռակողմ հայտարարությունը թույլ տվեց կանգնեցնել արյունահեղությունն ու կայունացնել իրավիճակը»,-ասել է Պուտինը: 

Պուտինը նաեւ ՌԴ ԱԳՆ ղեկավար Սերգեյ Լավրովին հանձնարարել է Ղարաբաղում իրավիճակի մասին տեղեկացնել միջազգային կազմակերպություններին եւ ԵԱՀԿ Մինսկի խմբի գործընկերներին

«Սերգեյ Վիկտորովիչ, Ձեզ խնդրել եմ տեղեկացնել գործընկերներին, առաջին հերթին՝ ԵԱՀԿ Մինսկի խմբի մյուս համանախագահ երկրներին, Լեռնային Ղարաբաղում իրավիճակի մասին: Ինչպես նաեւ հանձնարարել եմ կապ հաստատել միջազգային կազմակերպությունների հետ: Ո՞ր փուլում է գտնվում այդ աշխատանքը»,-ասել է Պուտին:

Նա նաեւ նշել է, որ շատ կարեւոր եւ ակտուալ է Լեռնային Ղարաբաղում խաղաղ կյանքին վերադառնալուն աջակցություն ցուցաբերելու հարցը:

«Շատ կարեւոր է, որպեսզի Լեռնային Ղարաբաղի հակամարտության գոտում ռազմական գործողությունների հետեւանքով տուժած բնակչությունը վերադառնա խաղաղ կյանքին»,-ասել է Պուտինը խորհրդակցության ժամանակ:

Խորհրդակցությանը մասնակցել են ՌԴ ՊՆ ղեկավար Սերգեյ Շոյգուն, ՌԴ ԱԳՆ ղեկավար Սերգեյ Լավրովը, ՌԴ ԱԴԾ ղեկավար Ալեքսանդր Բորտնիկովը, ՌԴ ԱԻՆ ղեկավար Եվգենի Զինիչեւը:

Zham.am