Փաշինյանի կողմից ապօրինի հրամաններ տալու, քաղաքական գործիչների նկատմամբ հետապնդումներ իրականացնելու հրահանգների մասին հայտարարությունները քննության առարկա չեն դառնա

Վարչապետ Նիկոլ Փաշինյանի կողմից իր լիազորությունները չարաշահելու` ՀՀ ոստիկանապեստին ապօրինի հրամաններ տալու, քաղաքական գործիչների նկատմամբ հետապնդումներ իրականացնելու ԱԱԾ-ին տրված հրահանգների մասին նախկին բարձրաստիճան պաշտոնյաների հայտարարությունները քննության առարկա չեն դառնա: Դատախազությունը չի պատրաստվում դրանց ընթացք տալ:

Հիշեցնենք, որ ՀՀ նախկին ոստիկանապետ Վալերի Օսիպյանը, որը ոստիկանապետ էր նշանակվել Փաշինյանի կողմից, երեկ հայտարարել է, որ իր պաշտոնավարման ժամանակ ապօրինի հրահանգներ ստացել է, բայց չի կատարել: Արդյոք այս հայտարարությունը քննության առարկա կդառնա «Փաստինֆո»-ի հարցին ի պատասխան հայտնեցին դատախազությունից նշեցին, թե «Այդ հայտարարությունը որոշակիությունից զուրկ էր: Եւ քանի որ այն արվել է իրավապահ մարմնի նախկին ղեկավարի կողմից, կարիք չկա լրացուցիչ ասել, թե հնարավոր հանցավոր դրսևորումների հետ առնչվելու պարագայում որն է դրա ճիշտ իրավական ընթացակարգը: Հիմա էլ նա զրկված չէ իրավապահ մարմիններին դիմելու և ներկայացնելու հնարավորություն»։

«Փաստինֆո»-ն նույնաբովանդակ պատասխան ստացավ նաև ԱԱԾ տնօրենի նախկին պաշտոնակատար Միքայել Համբարձումյանի հայտարարության՝ կապված քաղաքական հետապնդման հրահանգների հետ։ Դատախազությունից հայտնեցին, որ այդ հայտարարությունը որոշակիությունից զուրկ է, բացի դա, հայտարարությունն արվել է իրավապահ մարմնի նախկին ղեկավարի կողմից, ուստի, կարիք չկա նշելու, թե հնարավոր հանցավոր դրսևորումների հետ առնչվելու պարագայում որն է դրա ճիշտ իրավական ընթացակարգը:

Նախօրեին Մ.Համբարձումյանը հայտարարել էր. «Պարոն վարչապետ, ուզում եմ կրկնել այն, ինչ արդեն մեկ անգամ ուղիղ ասել եմ 27.10.2020թ. Վազգեն Մանուկյանի հայտարարության հետ կապված. թույլ և ոչ բավարար հիմքերով հարուցված քրեական գործերով չի կարելի քաղաքական ընդդիմախոսներին ձերբակալել, քաղաքական խնդիրները դրանով չեն լուծվում: Մարդկանց այդ միջոցներով հնարավոր չէ լռեցնել, ընդհակառակը` դրանից քաղաքական պայքարն ավելի է սրվում, քաղաքական դաշտում անջրպետն ավելի է խորանում, և հանրության շրջանում անարդարության զգացումն ավելի է մեծացնում իշխանության նկատմամբ անվստահությունն ու բացասական վերաբերմունքը: Ձեր մերձավորների հետ խորհրդակցելուց հետո այն ժամանակ Դուք, այնուամենայնիվ, ընդունեցիք իմ ասածը և զերծ մնացիք այդ ուղղությամբ ակտիվ գործողություններ իրականացնելու հանձնարարականներ տալուց: Սակայն ներկայումս նույն գործելաոճն եք կիրառում տասնյակ գործիչների նկատմամբ: Ուստի ևս մեկ անգամ կրկնում եմ` ձերբակալություններով, խուզարկություններով և այլ ռեպրեսիվ միջոցներով Ձեզ ցանկալի, դրական արդյունքի հասնել չեք կարող, եթե հասնեք էլ` դա լինելու է խիստ ժամանակավոր»:

Աղբյուր` Փաստինֆո