«Իմ քայլը»-ից Շիրակ Թորոսյանն ու Թագուհի Թովմասյանը տեղյակ չեն խմբակցության տարածած հայտարարությունից

Tert.am-ը փորձեց պարզել, թե արդյոք բոլո՞րն են տեղյակ եղել, որ խմբակցությունը նման հայտարարություն է տարածել, քանի որ հայտարարությունն արված էր բոլորի անունից:

«Իմ քայլը» խմբակցության պատգամավոր Թագուհի Թովմասյանը Tert.am-ի հետ զրույցում ասաց, որ Արցախում է և տեղյակ չի եղել «Իմ քայլը» խմբակցության հրապարակած հայտարարությանը և նույնիսկ ինտերնետ կապ չունի, որ ծանոթանա:

«Բացարձակ անտեղյակ եմ: Լավ կլիներ, որ քաղաքական հայտարարություններից քաղաքական թիմի անդամները տեղյակ լինեին»,-Tert.am-ի հետ զրույցում ասաց նա և նշեց, որ հասկանալի է, որ մենք պայքարում ենք ոչ միայն ադրբեջանական, այլ նաև թուրքական բանակի դեմ, դա նորություն չէր, և նորություն չէր նաև այն, որ համահայկական պայքար է եղել, ամեն մեկն իր ներդրումը ունեցել է:

«Ես ամեն դեպքում գնալու եմ Ազգային ժողով, երբ գամ Երևան, գնալու եմ աշխատանքի, ես չեմ պատրաստվում որևէ մեկից որևէ մի տեղ թաքնվել, ես պատգամավոր եմ և ընտրվել եմ ռեյտինգային ընտրակարգով, և ես իմ քաղաքացիներից փախչելու տեղ չունեմ»,-ասաց նա:

«Իմ քայլը» խմբակցության պատգամավոր Շիրակ Թորոսյանն էլ նշեց, որ գիշերն է վերադարձել առաջնագծից և որևէ բանից դեռ տեղյակ չէ, նոր է արթնացել:

Շիրակի մարզից ընտրված պատգամավոր Սոֆիա Հովսեփյանն էլ ֆեյսբուքում մեկնաբանել է, որ տեքստը, որին ծանոթ է եղել, հավելվել է. «Ես տեքստի առաջին մասին եմ ծանոթ, մնացածը՝ հավելվել է, որին ծանոթ չեմ եղել և ինչպես հասկացա՝ մեծամասնությունը»:

«Իմ քայլ» խմբակցության պատգամավոր Նարեկ Զեյնալյանը Tert.am-ի հետ զրույցում ասաց, որ տեքստը մշակել է «Իմ քայլը» խմբակցությունը, բոլոր պատգամավորները մասնակցել են, բոլորը տեղյակ են:

Նշենք, որ հավելումը վերաբերում է խմբակցության հայտարարության մեջ ներառված հետևյալ հատվածին. «Միևնույն ժամանակ Ղարաբաղյան պատերազմն ավարտելու մասին հայտնի հայտարարության իրավաչափությունը քննարկելուց առաջ առաջարկում ենք, որ ընդդիմությունը շատ հստակ ի լուր ողջ հայության և աշխարհի հայտարարի,

որ իրենք.

1. Կողմնակից են ռուսական միջնորդության չեղարկմանը

2. Կողմնակից են ռուսական խաղաղապահների դուրսբերմանը շփման գծից

3. Կողմնակից են պատերազմի շարունակմանը:

Այս հայտարարությունն անելուց հետո ընդդիմադիր ուժերը պարտավոր են նաև ներկայացնել առաջարկվող վերսկսվելիք պատերազմում հաղթանակի հասնելու ճանապարհային քարտեզը»: