Եթե այս իշխանությունը մնա, կարճ ժամանակ անց կկորցնենք այն, ինչ ունենք, ազգը պետք է ոտքի կանգնի. Գևորգ Գևորգյան
Արայիկ Հարությունյանն իր բոլոր հարցազրույցներում անվերապահորեն վստահում էր ՀՀ ներկա իշխանությանը: Եթե եղել են պատերազմից փախչողներ, դա եղել է իշխանության կազմակերպչական խնդիրը, այդ դեպքում ինչո՞ւ էին կամավորագրվում հազարավոր մարդիկ, ի՞նչն է պատճառը, որ գալիս էին Արցախ, բայց չէին կռվում: Այս մասին Tert.am-ի հետ զրույցում նշեց «Ազգային ճակատ» կազմակերպության հիմնադիր, ռազմական գործիչ Գևորգ Գևորգյանը, անդրադառնալով՝ Արցախի նախագահ Արայիկ Հարությունյանի երեկվա հայտարարությանը, որ համաձայնագիրը ստորագրվել է, որովհետև հակառակորդի համեմատ մեր ուժերը անհամաչափ էին:
Նրա խոսքով՝ իրենք էին իշխանությունը, պարտավոր էին ճիշտ կազմակերպել գործընթացը և ռազմական, ազգային ոգին բարձր պահել:
«Նիկոլ Փաշինյանը երկուսուկես տարի մեղքը գցում է բոլորի վրա և քանդում է այն պետականությունը, որը կերտեցինք, և վաճառում է այն սրբազան հողերը, որոնք ազատագրեցինք մենք: Ինքը աղանդավորական քայլեր է անում, մարդիկ, որոնք ինֆորմացիա չունեն, հավատում են իրեն, ֆեյքերի միջոցով ու ապազգային թիմով փորձում է լարումներ ու բախումներ բերել ներքաղաքական դաշտում, դրանով իսկ թուլացնելով թիկունքը, որպեսզի վերջնական նպատակին հասնեն տարածքների հանձման գործում: Ինչ վերաբերում «Իմ քայլը» կուսակցության երեկվա հայտարարությանը, դա շանտաժ էր՝ Նիկոլի ոճին համապատասխան, նա իր կյանքը ապրել է շանտաժով և շարունակում է նույն ուժով»,- ընդգծեց նա:
Գևորգ Գևորգյանի կարծիքով՝ Նիկոլ Փաշինյանը և իր թիմը պետք է հեռանան, որ հնարավոր լինի հայտարարության ստորագրությունը անվավեր ճանաչել և հետ վերադարձնել ազատագրված տարածքները.
«Նիկոլ Փաշինյանի ծրագրերից մեկն էր Հայաստանի Հանրապետությունն ամբողջովին հեռացնել և կտրել Ռուսաստանի Դաշնությունից։ Երեկվա «Իմ քայլի» հրապարակած երեք կետերը դրան էին ուղղված: Իսկ դա չի բխում հայ ժողովրդի ազգային անվտանգության շահից: Եթե այս իշխանությունը մնա, մենք շատ կարճ ժամանակ անց կկորցնենք այն, ինչ ունենք, ազգը պետք է ոտքի կանգնի՝ հասկանալով, որ իր ընտանիքի անվտանգությունն է վտանգված»:
Գևորգ Գևորգյանը, անդրադառնալով երեկ իրեն ԱԱԾ հրավիրելուն, նշեց, որ այդկերպ փորձում են ընդդիմությանը խոչընդոտել հանրահավաքին մասնակցելու համար: Նրա խոսքով՝ ստորագրություն են վերցրել, որ ԱԱԾ-ի Քննչական դեպարտամենտի ծանուցման պարագայում պատրաստ լինել ներկայանալ: