Եթե «Իմ քայլի» պատգամավորները չգան խորհրդարան, պրոցեսները դուրս կգան քաղաքական դաշտից և կսկսվեն բախումներ. ուզում եք քաղաքացիական պատերազմ լինի՞. Էդմոն Մարուքյան

ԱԺ նիստ գումարելու համար բավարար թվով ստորագրություններ ենք հավաքել, նիստը կարող ենք հրավիրել, եթե ԱԺ խորհրդի նիստը կայանա, բայց խորհրդի նիստը գումարելու համար պետք է 3 մարդ: Այս մասին ֆեյսբուքի իր էջի ուղիղ եթերով ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը:

«20:15 ԱԺ խորհրդի նիստ գումարվեց, Լենա Նազարյանը ժամանեց խորհրդարան, ես նրան ասացի, որ պրոցեսները պետք է բերել քաղաքական ուղիներով: Դրա համար խնդրեցի տիկին Նազարյանին, որ անպայման կապվի խորհրդի անդամների հետ, որ կարողանանք գումարել խորհդրի նիստը: Խորհրդի նիստը բաց է դեռևս 2 ժամ»,- ասաց նա:

Էդմոն Մարուքյանի խոսքով՝ խորհդրի նիստին ներկա էր 7 անդամ, անրաժեշտ է ևս 3 խորհրդի անդամի ներկայություն, որպեսզի հնարավոր լինի նիստը անցկացնել:

«Հայաստանը խորհրդարանական երկիր է, ժողովուրդը 73 տոկոս ձայն է տվել մի ուժի, որի պատգամավորները չեն գալիս խորհրդարան, որ նիստ գումարենք: 88 պատգամավորից մեկ մարդ է եկել՝ ԱԺ փոխնախագահ Լենա Նազարյանը: Եկեք, այս ճգնաժամի պահին ժողովրդին մի բան ասեք: Իշխանություն կա՞ երկրում, թե՞ անիշխանություն է սա»,- նշեց պատգամավորը:

Էդմոն Մարուքյանը հայտարարեց, որ դեռ 2 ժամվա ընթացքում հնարավոր է խորհրդի նիստ իրականացնել և կոչ արեց «Իմ քայլը» խմբակցության պատգամավորներին գալ խորհրդարան:

«Եթե նիստը չկայացավ, պրոցեսները դուրս կգան քաղաքական դաշտից և կսկվեն բախումներ: Քաղաքացիական պատերազմ եք ուզում լինի: Ոնց որ վարչապետն է իշխանությունը ստանձնել և չի մտածել, որ բացի դաչայից և մերսեդեսից կա նաև Արցախի հիմնախնդիր, այնպես էլ, որքան հասկանում եմ, պատգամավորներն են, մտածել են, որ պատգամավոր լինելը միայն 460 հազար դրամ աշխատավարձ է, դիվանագիտական անձնագիր, անձեռնամխելիություն, գործուղումներ: Պատգամավորի գործը նաև այն է, որ ռիսկ անեք, գաք այս շենք»,- ասաց նա։

Մանրամասները՝ տեսանյութում: