Մենք թույլ չենք տալու հանցագործ միավորներին զավթել իշխանությունը. Էդուարդ Աղաջանյան

Մենք թույլ չենք տալու հանցագործ միավորներին զավթել իշխանությունը եւ օրենքով սահմանված բոլոր միջոցները գործարկելու ենք այդ նպատակին հասնելու համար։ Այս մասին ֆեյսբուքյան իր էջում գրել է Վարչապետի աշխատակազմի ղեկավար Էդուարդ Աղաջանյանը։

«Սիրելի՛ հայրենակիցներ,

Միանշանակ է, որ այսօր հանրության գերակշիռ հատվածի ակնկալիքը գործող իշխանություններից հետեւյան է. ապահովել երկրի ներքին կայունությունը եւ թույլ չտալ որոշ կասկածելի միավորների առիթից օգտվել եւ առաջ քաշել նեղ անձնական շահերից բխող ռեւանշիստական օրակարգեր։ Վստահեցնում եմ ձեզ, որ մենք դա թույլ չենք տա։

Միաժամանակ պարզ է, որ հասկանալի պատճառներով ձեզ մոտ բազմաթիվ օբյեկտիվ հարցեր են ծագում ստեղծված իրավիճակի  վերաբերյալ, որոնց պատասխանները դեռեւս չեն տրվել։ Վստահեցնում ենք, որ այն ծավալի տեղեկատվությունը, որն այս պահի դրությամբ հրապարակվել է վարչապետի եւ այլ պաշտոնատար անձանց կողմից, առավելագույնն է, որ այս պահին հնարավոր է հանրայնացնել։ Բայց եւ պետք է վստահ լինեք, որ որեւէ մանրուք այս ամբողջ գործընթացի վերաբերյալ հանրությունից չի թաքցվելու։ Դա ուղղակի բացառված է։

Պետականության շուրջ համախմբման կոչ անելն այս պահին նույնիսկ անիմաստ եմ համարում, քանի որ այդ համախմբվածությունն ըստ էության այս պահին կա. մենք դա տեսնում ենք, եւ հատկապես այս իրավիճակում դա առավել քան պարտավորեցնող է։ Միաժամանակ, յուրաքանչյուր ոք, ներառյալ մեր քաղաքական թիմը, պետք է պատրաստ լինի ստանձնելու պատասխանատվության իր բաժինը։

Մենք թույլ չենք տալու հանցագործ միավորներին զավթել իշխանությունը եւ օրենքով սահմանված բոլոր միջոցները գործարկելու ենք այդ նպատակին հասնելու համար։

Չկասկածեք»,- գրել է նա։