90-ականներից մինչ այսօր որևէ քննարկվող փաստաթղթում չկար նախկին ԼՂԻՄ տարածքների՝ Հադրութի, Շուշիի հանձնում Ադրբեջանին, այս հանգրվանին ենք հասել ապաշնորհ կառավարման հետևանքով. Է. Շարմազանով. Տեսանյութ

2.5 տարի շարունակ ՀՀ իշխանությունը՝ Փաշինյանի գլխավորությամբ, փակուղի մտցրեց բանակցությունները, բանակցային գործընթացն անզգույշ, հակասական, էմոցիոնալ հայտարարություններով, որոնք վնաս էին հասցնում թե՛ ՀՀ-ին, թե՛ Արցախին. այս մասին ֆեյսբուքյան ուղիղ եթերում ասաց ՀՀԿ խոսնակ Էդուարդ Շարմազանովը:

Նա հիշեցրեց վարչապետ Նիկոլ Փաշինյանի որոշ հայտարարություններ. օրինակ՝ «Արցախը Հայաստան է, և վերջ», «Ինչ պետք է, այն էլ բանակցում եմ», «պետք է երկխոսել Ադրբեջանի ժողովրդի հետ», «պետք է լուծում, որ ձեռնտու կլինի նաև Ադրբեջանի ժողովրդին», թվեց նա և նշեց, որ նման հայտարարությունները թուլացրին հայկական կողմերի կառուցողական դիրքերը բանակցություններում:

«Նույն 2.5 տարվա ընթացքում Փաշինյանն ու իր շրջապատը միակողմանի խաղաղության, խաղաղասիրության քարոզ էին իրականացնում, երբ նույն ժամանակ էրդողանն ու Ալիևը համատեղ շքերթներ էին կազմակերպում և պատերազմի կոչեր անում: Նույն այդ ժամանակ ՀՀ-ում տեղի էր ունենում հարձակում արժեքների՝ եկեղեցու վրա, ոտնձգություն հայոց պատմության ու լեզվի վրա, վարկաբեկվում էին արցախյան փառապանծ, հերոսական ճանապարհ անցած գեներալները, սպաները, ինչը մտահոգիչ էր»,- հիշեցրեց նա:

Շարմազանովն ընդգծեց՝ այս պատերազմի 44 օրերի ընթացքում իշխանությունները, թվացյալ հաղթական կոչերով խաբելով ժողովրդին, թե՛ հաղթելու ենք, հաղթում ենք, հասցրին նրան, որ ստորագրվեց հայտարարություն, որը փաստացի կապիտուլյացիայի ակտ է. «Որևէ քննարկվող փաստաթուղթ 90-ականներից մինչև այսօր նման տխուր և ոչ հայանպաստ լուծումներ չէր պարունակում: Որևէ փաստաթղթում չկար նախկին ԼՂԻՄ տարածքների՝ Հադրութի, Շուշիի վերադարձը Ադրբեջանին, նույնիսկ պատերազմից առաջ նման պահանջներ թուրք-ադրբեջանական տանդեմը չուներ: Այս հանգրվանին ենք հասել այսօրվա իշխանության ապաշնորհ կառավարման հետևանքով»,- նշեց նա և հավելեց, որ Փաշինյանի հետ հանդիպման ժամանակ էլ ասել է, որ այս ամենի քաղաքական պատասխանատուն նա է:

«Ավելին՝ նույն վարչապետը ծածուկ ժողովրդից ստորագրում է հայտարարություն, նա այն վարչապետն էր, որ հայտարարում էր Ղարաբաղյան հիմնահարցը, եթե որևէ լուծում լինի ընդունելի, կհավաքվեն Հանրապետության հրապարակում և 3 մլն վարչապետների հետ կքննարկեն, սակայն մենք տեսանք, որ այս խայտառակ, դավադրական գործարքը տեղի ունեցավ ժողովդրից ծածուկ, ավելին՝ առանց ժողովրդի հետ քննարկելու»,- ասաց նա:

Շարմազանովը հայտարարեց՝ ընդդիմադիր կուսակցությունները 40 օր շարունակ որևէ ներքաղաքական պահանջ չէին ներկայացրել. «Մեր առաջարկությունները, հորդորները «ձայն բարբառո հանապատի» էին այս իշխանության և վարչապետի համար: Մենք՝ ընդդիմադիր կուսակցություններով, պահանջ էինք ներկայացրել վարչապետի անցնում, ինքնակամ հեռացման մինչ այս հայտարարությունը, որովհետև ունենք համոզում, որ ՀՀ-ին, ԱՀ-ին որևէ ցնցում պետք չէ, բայց դրա փոխարեն՝ Փաշինյանն իր լայվերով մեղքը իր վրայից գցում է, մեղավորներ նշանակում թե՛ մեզ, թե՛ ժողովրդին, գեներալներին, սպաներին, բանակին. բոլորը մեղավոր են, բացի իրենից»,- ասաց նա և հիշեցրեց, որ հենց Փաշինյանի իշխանությունն էր ասում՝ «նոր պատերազմ, նոր տարածքներ»:

«Իրենք էին խոսում հաղթանակի մասին, ասում էին՝ Սարդարապատ է, բայց ստացանք «Կարսի խայտառակ հանձնում»: Փաշինյանը դեռ ժամանակ ունի ճիշտ որոշում կայացնելու, չգնալու ցնցումների ճանապարհով, որին ինքը տանում է հասարակությանը իր լայվերով, խոսում վրեժներից, վենդետաներից, այսօր դրա ժամանակն է՞: Սա մի քայլ պետք է անի՝ հեռանա»,- նշեց նա:

Միևնույն ժամանակ Շարմազանովը դատապարտեց հակաօրինական բռնության ցանկացած դեպք. «Դատապարտում եմ հակաօրինական բռնության ցանկացած դեպք, այդ թվում՝ նախօրեին տեղի ունեցածը, դա անընդունելի է մեզ համար»,- ասաց նա: