Ներկայացումն ավարտվեց՝ հիմա էլ ռեկվիզիտն են հավաքում

Էն, որ ասում էին է, թե բա «մենք կրկեսի վերածելու հայրենիք չունենք», դա արդեն ուժի մեջ չի՞։ Գրեթե ամենօր լրատվականները գրում են, որ այս կամ այն պարտված հանրապետականը ընտրակաշառքներն է փորձում հետ հավաքել, կամ գյուղացիներից խլում է այն, ինչ տվել էր այդ համայնքներին՝ իր օգտին քվեարկելու համար։ Փաստորեն, ներկայացումն ավարտվեց՝ հիմա էլ ռեկվիզիտն են հավաքում։

Երեկ տեղեկություն տարածվեց, որ ԱԺ արդեն նախկին պատգամավոր Հակոբ Հակոբյանը՝ Պիվի Հակոբը, Հաղարծին համայնքից հետ է վերցրել իր նվիրած «Ուազը»։ Ընդ որում հերիք չի «Ուազն» էր հին, մի բան էլ այն օգտագործում էին կոյուղին նորոգելու համար․․․բայց դե՝ «ձենգի նե պախնուտ»։ Այնպես է նեղացել այս «ազգի նվիրյալը», որ աջ ու ձախ հայտարարում է, թե էլ ոչմեկին չի օգնելու։ Ջհանդամը օգնես։

Հիմա էլ Մանվել Գրիգորյանի հորեղբոր տղան է խառնվել իրար ու որ ինքը նույնպես չի ընտրվել, անջատել է Արագած գյուղի փողոցային լուսավորությունը և փակել է մանկապարտեզը։ Ով չգիտի, ասեմ, որ գեներալ Մանվելի այս եղբայրը՝ Հրանտ Գրիգորյանը նույնպես թեկնածություն էր դրել և այդ գյուղում հավաքել էր 203 ձայն։ Սա խոսում է մեր պետության, պետականության անմխիթար վիճակի մասին։ Փաստորեն ամբողջ գյուղեր ու գյուղական համայնքներ հանձնված են Սերժ Սարգսյանի սպասավորներին և այնտեղ պետությունն անելիք չունի․բոլոր հարցերը լուծում են այս «իշխանները»․և կոմունալ ծառայությունների մատակարարումը ոչ թե պետության պարտականություն է, որի համար հարկեր ենք վճարում, այլ այդ տեղական «իշխանների» լավություն, որ կարող են անել, կամ էլ չանեն։

Ի՞նչ ասեմ, մենք ինքներս ենք ընտրել այսպիսի ստրկական կարգավիճակը։ Էն Շմայսի խայտառակ վիդեոն հիշու՞մ եք չէ։ Եվ խայտառակը Շմայսի պահվածքը չէր, որ ասֆալտով փորձում էր ձայն առնել, այլ ժողովրդի արձագանքը, որ պատրաստ էին այդ ձայնը վաճառել։ Փոխանակ համայնքային իշխանություններից պահանջեն փողոցներն ասֆալտել, գնացել են Շմայսի դեմը վիզ են ծռում․․․չեմ զարմանա, եթե ինքն էլ գա էտ ասֆալտը քերի տանի։

Հրանտ Ենոքյանի ֆեյսբուքյան էջից