Այս որոշումը կայացրել ենք՝ հաշվի առնելով ռազմական իրադրությունը և ոչ միայն այսօրվա, այլև դրա հնարավոր շարունակությունը. Փաշինյանը՝ Արցախում պատերազմը դադարեցնելու որոշման մասին. Տեսանյութ

Ես ծնկի եմ գալիս մեր բոլոր նահատակների առաջ և ոչ միայն այս պատերազմի, այլ դրանից առաջվա նահատակների, նրանց մայրերի, հայրերի քույրերի, եղբայրների, կանանց, երեխաների առաջ, ես նաև նրանցից ներողություն եմ խնդրում, որ չենք կարողացել իրենց գործը պատշաճ մակարդակով շարունակեl: Այս մասին ֆեյսբուքյան իր էջի ուղիղ եթերում ասաց ՀՀ վարչապետ Նիկոլ Փաշինյանը:

«Բայց մենք այս որոշումը կայացրել ենք հաշվի առնելով ռազմական իրադրությունը և ոչ միայն այսօրվա, այլև նրա հնարավոր շարունակությունը: Ես խնդրում եմ բոլոր քաղաքացիներին տուրք չտալ ջարդադարների խմբերին, այնտեղ արդեն ես իմացա` ովքեր են, հայտնի կուսակցական շրջանակներ: Օրինակ մարդ կա այդ կուսակցական շրջանակներից, որ հարուցված քրեական գործի շրջանակներում պետությանը 80 միլիարդ դրամի պարտավորություն ունի, դա մոտավորապես 175 միլիոն դոլարի կարգի է, այսինքն դա ավելին է, քան Հայաստան համահայկական հիմանդրամի հավաքած փողը, որը պետք էր այս տարիներին վճարվեր բյուջե, և դրա առնվազն կեսը դառնար զենք, տեխնիկա, գիտություն, անօդաչու թռչող սարք և այսպես շարունակ: Այդ մարդիկ դեբոշ են անում իրենց թալանելու իրավունքը վեր գտնելու համար, 2,5 տարի ատամները կռճտացնելով լցվել են: Այո ես ընդունում եմ, որ մենք այս 2 տարվա ընթացքում չենք արել էն չափի կոռուպցիոն գումարների վերադարձ, որ պետքա անեինք, բայց մենք փորձել ենք և փորձում ենք ամեն ինչ օրինական մեթոդներով անել»,-ասաց նա:

Վարչապետը նշեց, որ ամեն ինչի մասին չի կարող պարզ խոսել, մանրամասները ներկայացնել, քանի որ իրավիճակը ռազմաճակատում կայուն չէ: «Շատ կարևոր է, որ այնպես չանենք, որ վնաս չտանք, ես հասկանում եմ էմոցիաները, դրանք պետք է արտահայտվեն, դուրս գան, բայց այս խոսակցությունը մանրամասն անելու ժամանակ դեռ կունենանք, և ոչ մի պատասխանատու, նա, ով պատասխանատու է, պատասխանատվությունից չի փախչի, այդ թվում՝ ես, եթե պատասխանատու եմ, պատասխանատվությունից չեմ փախչի բնականաբար»,-ասաց նա:

Նիկոլ Փաշինյանը ՀՀ քաղաքացիներին կոչ արեց չտրվել սադրանքներին: «Ուզում եմ վստահ լինեք, որ ես ինքս, մեր կառավարությունը, իշխանության ներկայացուցիչները հնարավոր ամեն ինչ արել են, որ մենք այսպիսի արդյունքի չհանգենք, ինչու դա չի ստացվել, հենց դա է ամենակարևոր խնդիրը, և հենց այդ մասին է, որ պետք է տեղի ունենա մանրամասն խոսակցություն: Մենք մարզպետների ջոկատներ ունենք, որ դիրքերում կանգնած է, ընդ որում ջերմության մեջ մի մասը, գիտեք՝ ինչու են դիրքերում ջերմության մեջ կանգնած, կորոնավիրուսով հիվանդ, թոքաբորբով, որովհետև այսօր դեբոշ անող որոշ մարդիկ, օրինակ, չեն գնում և չեն գնացել իրենց դիրքում փոխարինելու: Այսօրվա հանցագործությունների բոլոր կազմակերպիչները խստագույն պատասխանատվության են ենթարվելու, սրանում չկասկածեք»,-ասաց նա: