ԱԺ նախագահ՝ Շարմազանով, ՀՀԿ խմբակցության ղեկավար՝ Աշոտյան

Սերժ Սարգսյանի ընտանիքին մոտ կանգնած «Ժամանակ» օրաթերթը այսօր տեղեկություն է հրապարակել, համաձայն որի ԱԺ նորընտիր նախագահի պաշտոնում կընտրվի Էդուարդ Շարմազանովը, իսկ ՀՀԿ խմբակցության ղեկավար կդառնա Արմեն Աշոտյանը:

Սա առավել ճշմարտության մոտ կանգնած տեղեկատվությունն է, և ոչ միայն այն պատճառով, որ այն տպագրվել է «Ժամանակ»-ում, այլև այն, որ Սերժ Սարգսյանի համար այս չափազանց կարևոր անցումային փուլում խիստ անհրաժեշտ է, որ այս երկու պաշտոնները զբաղեցնեն իրեն անձամբ հավատարիմ գործիչները:

Շատերը կզարմանան, թե ինչ է նշանակում հավատարիմ գործիչ, այն էլ՝ այս խիստ անորոշ ժամանակաշրջանում: Սակայն, նույնիսկ այս ժամանակաշրջանի համար և նույնիսկ սեփական կուսակցության շատ գործընկերներ Սերժ Սարգսյանի համար, մեղմ ասած, վստահելի չեն, քանզի նա շատ լավ գիտի, թե ինչ է նշանակում «ճիշտ պահին» «քցել» իր գործընկերներին, դավաճանել իր 20 տարվա ընկերոջը և նրա դեմ անբարոյական լրատվական արշավ սկսել:

Այս ամենը Սերժ Սարգսյանը շատ լավ գիտի և վախենում է, որ 2018 թ. հետո, երբ ավարտվեն իր նախագահական լիազորությունները, ըստ էության, իր ազդեցության լծակները ՀՀԿ-ում զգալիորեն կարող են թուլանալ: Ահա այս հանգամանքը հաշվի առնելով՝ գործող նախագահն ամեն ինչ կանի, որ այս կարևորագույն ժամանակաշրջանում այս երկու պաշտոնները զբաղեցնեն մարդիկ, ովքեր նույնիսկ տեսական շանս չեն ունենա հեռանալ իրենից, մարդիկ, ովքեր հրապարակավ քննադատել են Հովիկ Աբրահամյանին, Գագիկ Ծառուկյանին և իրենց խիստ հեռու են պահում գործող վարչապետ Կարեն Կարապետյանից: Հենց այս հատկությունները հաշվի առնելով էլ, Սերժ Սարգսյանը, հավանաբար, որոշում է կայացրել այս երկու գործիչներին նշանակել այս պատասխանատու պաշտոններում, և այդ մասին այս լուրը տարածել է իր ընտանեկան լրատվամիջոց հանդիսացող «Ժամանակի» միջոցով:

Արտակ Հակոբյան