«Անում ենք այնպես, ինչպես անհրաժեշտ ենք գտնում՝ ըստ արդյունավետության». ԱԳ նախարարը՝ ՀԱՊԿ-ին չդիմելու մասին. Տեսանյութ

Անհրաժեշտ բոլոր աշխատանքները տարվում են այդ առումով. ես ավելին չեմ կարող ասել: Այս մասին այսօր՝ նոյեմբերի 5-ին, ԱԺ-ում լրագրողների հետ զրույցում նշեց Հայաստանի ԱԳ նախարար Զոհրաբ Մնացականյանը՝ անդրադառնալով նրան, որ օրերս ՀՀ վարչապետը դիմել էր ՌԴ նախագահին սկսելու անհապաղ խորհրդակցություններ՝ սահմանելու աջակցության տեսակները և չափը, որը ՌԴ-ն կարող է հատկացնել Հայաստանին՝ իր անվտանգության ապահովման համար: Հայտնում է NEWS.am-ը:

«Այն, ինչ վերաբերում է մեր պայմանագրային հարաբերություններին եւ դրանից բխող գործառույթներին, ինչ անհրաժեշտ է, հիմա արվում է:

1997 թվականի պայմանագիրը բազային պայմանագիրն է, որից բխում են նաեւ գործառույթներ, որոնք արտահայտված են նաեւ այլ փաստաթղթերի մեջ:

Հարցին, թե կա՞ ՀԱՊԿ-ին դիմելու կաշկանդվածություն՝ հաշվի առնելով, որ ՀԱՊԿ-ի անդամներից առնվազն երկուսը՝ Բելառուսն ու Ղազախխստանը Ադրբեջանի անմիջական տնտեսական գործընկերներն են, նախարարը պատասխանեց. «Ձեր հարցը խորը վերլուծությունների եւ առանձին երկար քննարկումների հարց կարող է լինել: Իսկ կոնկրետ պատասխանը հետեւյալն է. մենք մեր քայլերն իրականացնում ենք այնպես, ինչպես որ անհրաժեշտ ենք գտնում արդյունավետության ու արագության առումով:

Մենք աշխատում ենք երեք համանախագահների հետ եւ աշխատում ենք առանձին երկրների հետ որպես ըստ մեր ունեցած գործիքակազմի: Մեր ամբողջ գործիքակազմը գործադրվել է առաջին իսկ օրվանից: Եթե համարել ենք, որ այդ գործիքակազմից այս մեկն ենք օգտագործում, այդ մեկն էլ օգտագործել ենք եւ շարունակելու ենք դա անել»: