Դեռահասն «Ալլահ աքբար» գոռալով հարձակվել է Թաթարստանի ոստիկանության շենքի վրա
Թաթարստանի Կուկմոր քաղաքում դեռահասը հարձակվել է ՆԳՆ բաժանմունքի շենքի վրա։ Հարձակվողը զինված է եղել դանակով, նա գնդակահարվել է ոստիկանության կողմից։
Քննչական կոմիտեից հայտնել են, որ հարուցվել է քրեական գործ՝ «Ահաբեկչության փորձ» հոդվածով:
ՔԿ հաղորդմամբ՝ գիշերը Կուկմոր քաղաքում 16-ամյա դեռահասը փորձել է հրկիզել ոստիկանության շրջանային բաժնի շենքը: Դրանից հետո նա դանակով հարվածներ է հասցրել ոստիկանության աշխատակցին։ Մեկ այլ ոստիկան նախազգուշական կրակոցներից հետո ստիպված է եղել կրակ բացել։ Ստացված վնասվածքներից չարագործը մահացել է մինչև բժիշկների ժամանումը:
Թաթարստանի ՆԳՆ մամուլի ծառայությունից հաստատել են, որ հարձակվողն ակտիվ դիմադրություն է ցույց տվել և ոստիկաններից մեկին դանակի մի քանի հարված է հասցրել: Կտրած-ծակած վնասվածքներով ոստիկանը հոսպիտալացվել է, նրա կյանքին վտանգ չի սպառնում:
«Ինտերֆաքսի» աղբյուրի փոխանցմամբ՝ Բաշկիրիայում ծնված երիտասարդը, որը բնակվում էր Կուկմորում, ոստիկանությունում հաշվառված է եղել որպես ծայրահեղականության հակում ունեցող:
«Ոստիկանների վրա հարձակման ժամանակ նա նրանց անհավատ է անվանել և Ալլահ աքբար բղավել»,- ասել է գործակալության զրուցակիցը։
Հետևեք մեզ Facebook-ում