Մի քանի օրից ռազմաճակատ կմեկնի եզդիական երկրորդ ջոկատը. Բաքոյան

«Իրավունքի» հետ զրույցում ԱԺ «Իմ քայլը» խմբակցության պատգամավոր, ազգությամբ եզդի ՌՈՒՍՏԱՄ ԲԱՔՈՅԱՆՆ ասաց, որ գտնվում է Արցախում: Նրանից հետաքրքրվեցինք եզդիական ջոկատի եւ ընդհանրապես՝ Արցախում տիրող մթնոլորտի մասին:

- Եզդիական ջոկատի կամ եզդի տղերքի մասին պետք է առհասարակ ասեմ, որ տրամադրությունները բարձր է, ոգին՝ մարտական: Պատրաստ են ցանկացած մարտական առաջադրանք կատարելու եւ կատարում են: Հպարտ եմ, որ այս ազգի զավակն եմ ու իմ ախպերներն այսքան դուխով, այսքան ուժեղ կարողանում են մեր հայրենիքի սահմանը պաշտպանել: Եզդիական երկրորդ ջոկատը հիմա պատրաստություններ է անցնում եւ արդեն մի քանի օրից կմեկնի առաջնագիծ՝ պաշտպանելու մեր սահմանները: Ուստի՝ իմ եզդի համայնքին կոչ եմ անում գիտակցաբար մոտենալ այս իրավիճակին, գնահատել պատերազմի լրջությունը եւ պատրաստ լինել ցանկացած կորստի, որովհետեւ պատերազմն ազգություն չի ճանաչում եւ սահմանին զոհվում են թե՛ եզդիները, թե՛ հայերը: